› 選擇地區
三藩市
紐約
洛杉磯
其他美國地區
香港 台灣 北美
 
2016年06月27日

隔牆有耳:
大埔街市老鼠為患 
岳少爭取 貓奴自救 - 李八方

咪以為岳少掛住玩貓,其實佢去大埔街市睇吓商戶點對付鼠患咋。
呂浩賢攝

立法會家陣已經有位鼠王芬,遲啲可能多一個貓王岳,唔知會唔會喺立法會上演貓捉老鼠嘅一幕?話說公民黨新東立法會議員楊岳橋發現,大批師奶幫襯嘅大埔街市鼠患好嚴重,所以佢早前就實地去睇一睇,聽到有商戶話滅鼠唔係冇計,好似佢哋養咗貓之後就冇乜老鼠,但食環署講明唔畀街市養貓喎,岳少有見及此變身貓王,星期三約見食環署跟進。

養貓扣分 甚至要收檔

岳少同八方講,上月底訪問咗500幾位市民,發現六成幾人都話有需要改善大埔街市嘅衞生環境、尤其鼠患問題,竟然逾九成人話嗰度經常有老鼠出沒。岳少因此親自落街市睇過,有商戶反映鼠患問題一直有,但自從一、兩年前轉咗外判清潔商就嚴重咗,雖然佢哋都同食環署講過,食環亦嘗試解決,但作用唔大,惟有自己檔位自己救。

點救呢?唔使搵鼠王芬嘅,養隻貓咪得囉!但食環又講明唔畀街市養貓,否則扣分甚至收番個檔,商戶惟有靜雞雞養。有商戶就同岳少呻,如果啲貓周圍走、大小二便就話唔好箒,但商戶養貓養得好企理,重點係想防鼠患,加上老鼠對衞生嘅影響更大,覺得食環係咪可以放寬吓?
岳少都話街市嘅貓唔單止乾淨,仲好聽人話,幫手看舖㖭!連唔養貓嘅檔主都話,附近檔位養咗貓之後連佢個檔位都少咗老鼠。岳少話星期三見食環署助理署長時會跟進呢個問題。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載