› 選擇地區
三藩市
紐約
洛杉磯
其他美國地區
香港 台灣 北美
 
2016年06月03日

隔牆有耳:
如果我係梁振英 
四叔︰我就唔做喇 - 李八方

特首跑馬仔就開賽,一男子恨連任恨到出晒面咁,但城中班大孖沙梗係睇定啲先,費事好似上屆咁,臨尾先要「華麗轉身」!噚日恒地主席、四叔李兆基講開特首梁振英嗰陣,除咗講番3月份講過嘅評價,即係梁振英好勤力,啲公益活動好幫到手,慈善有啲功勞外,卻離奇加一句,如果佢係CY,就唔會做特首嘞。莫非係恒基喺馬屎埔清場之際,順道暗示CY都應該清走埋?
其實四叔咁精靈兼心水清,點解會講嚟講去三幅被,無限loop舊料?唔通佢覺得CY任內只係得呢啲嘢可以講吓,其他方面貢獻有限,所以冇乜好講?事實可能係,根本中央都未吹雞叫撐邊個,而四叔談CY前都利申咗先,「我唔係話幫梁振英啲咩嘢」,但就話喺香港做特首好難,要任勞任怨,唔知對方下屆仲出唔出嚟選喎。

不覺特首權力大

CY早排話自己上任後,冇人再提「地產霸權」,港視主席王維基隨即寸爆回應,因為有乞人憎嘅「特首霸權」。四叔話唔覺特首權力太大,仲話𠵱家好多人講好多批評特首嘅嘢。之不過,四叔最尾竟然爆咗句︰「如果我係梁振英,我就唔做(特首)喇。」呢句說話有冇玄機?話冇,大家信唔信?唔通意在整個落台階出嚟,乘機「勸退」CY?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載