› 選擇地區
三藩市
紐約
洛杉磯
其他美國地區
香港 台灣 北美
 
2016年06月01日

隔牆有耳:為新店「北河同行」題字
蔡瀾大筆一揮撐明哥 - 李八方

係咪個名有個「明」字,都會受歡迎啲?好似深水埗明哥咁,一直有唔少粉絲,據聞明哥嘅新店會喺本月中至月底嘅周末開張,特別之處係請咗全城最知名嘅食家提字,就係蔡瀾嘞。原來蔡瀾係明哥偶像,明哥朋友知道後四出聯絡,終於搵到蔡san。蔡san爽快應承,大筆一揮,為明哥新店留下墨寶,題字「北河同行深水埗」,為飲食界留下美事。

社企式經營自負盈虧

明哥因為派飯而聞名,為人熟悉嘅係正店—北河街北河燒臘飯店,另一間大南街副店之前被業主加租,3月底結業,幸獲對面街業主謝林讓出舖位畀佢延續善舉。新舖原來唔只「餐廳」咁簡單,因為用社企方式經營,會自負盈虧,換句話講會盡量降低食物價錢,希望基層市民用合理價錢就可以食好西,而且有心人捐出嘅飯票,100%用番喺有需要人士身上,唔似出面一啲慈善機構,大筆錢去咗行政費。
新店名都與別不同,唔係叫乜記或乜乜茶餐廳,而係叫「北河同行(深水埗)」,名稱代表咗明哥心願,希望大家一齊行善,明哥想將來遍地開花,例如有北河同行(元朗)、北河同行(天水圍)……
香港好多善心人,早前新舖被報道過裝修費貴,之後好多人主動向明哥免費提供不鏽鋼爐具、磁磚、LED照明系統及電視機等,仲有匿名善長捐咗一批分體式同掛牆冷氣,值十幾萬㗎,令明哥好感動同感恩。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載