蘋果日報 | APPLE DAILY
› 選擇地區
三藩市
紐約
洛杉磯
其他美國地區
2016年05月30日
馬上成為壹會員

隔牆有耳:
CY:上任後冇人提地產霸權 
維基解密「因為有特首霸權」 - 李八方

距離明年3月特首選舉只有約10個月,難怪唔理市民係咪支持、唔理自己有冇班底、唔理有冇其他更合適人選,梁振英開始高調爭連任。繼之前喺商台大談行李門事件會吸取教訓圖洗底,近日接受無綫訪問聲稱港足大戰時支持港隊想討港人歡心(咁點解當時唔表態呢?),同時繼續邀功mode,今次自誇上任後冇人再提「地產霸權」。咁又確實係要「歸功」CY㗎喎。點解?等王維基幫大家拆解!
積極考慮參加立法會選舉、擬循港島區直選嘅王維基,開宗明義話咗唔想梁振英連任,道出唔少市民心聲。知己知彼,CY嘅一舉一動,王維基當然都要密切關注,而無綫噚日播出CY個訪問後,王維基迅速喺facebook拆解CY嘅語言偽術。

話唔敢反抗方丈好大鑊

王維基貼咗新聞報道後留言話:「沒有人再說『地產霸權』,因為有更討厭的『特首霸權』。換咗你(CY),當然解決不了香港所有問題(因為你過去4年帶給我們太多問題了),但就解決了『你』這個問題的源頭!」呢番話引起唔少網民留言,有人叫維基小心,「方丈好小器」;維基回應多謝關心,但強調香港已到「臨界點」,若大家都「小心」而唔敢反抗CY,「他連任至2022年,那時候,就不堪設想了」。有網民留言鼓勵叫佢堅持,「如果你真係選議員,我會支持你」。面對呢位反梁悍將,唔知「梁粉」係咪度緊以「奇(定係『陰』)招制勝」?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載