› 選擇地區
三藩市
紐約
洛杉磯
其他美國地區
香港 台灣 北美
 
2016年05月23日

隔牆有耳:
讚Gin Lee 馮允謙唱得好 
AO歌王:欣宜《女神》啱feel - 李八方

年長一代總係鍾意話下一代點樣不濟、點樣唔夠上一代叻嘅,但有「AO歌王」之稱、已經退休嘅民政事務局前常任秘書長楊立門就唔係喇,仲識英雄重英雄,噚日出席活動時點名讚呢排有啲歌手唱得幾好,唔知幾時會同呢班靚聲王組隊演出,以歌會友呢?
獲AO歌王大讚嘅包括一男一女,就係巨聲幫出身嘅馮允謙同來自馬來西亞嘅李幸倪(Gin Lee)。查實馮允謙出道5年嘞,最近一首《Keep On, Fight On》聽到人好雀躍;Gin Lee仲勁,今年已有《雙雙》同《月球下的人》兩首冠軍歌,證明楊立門好識貨。

話未夠班學黎明開騷

咁AO歌王有冇聽過近期熱播、欣宜嗰首《女神》呢?楊立門話有喎,呢首歌真係好啱欣宜唱,雖然首歌唔係話好好聽(嗯……),但啲詞就真係欣宜先至唱到出嚟。咁又係,唱歌都要講feel嘅,欣宜演繹嘅呢首歌,真係打動唔少人心㗎!
原來楊立門下星期會同二胡王子王憓(Ray)再度合作開騷,「佢作咗啲歌等我唱,仲有一首黎小田嘅新歌,我要同佢唱,久唔久我就有呢啲concert」。過去幾年不斷開騷嘅佢話今年冇搞大騷,但透露密鑼緊鼓搞緊出年嘅騷。
八方多嘴問句,幾錢唱一首歌?楊立門話佢𠵱家統統都係義工、為公益唱歌,但揚言「遲啲會睇吓係咪搞番屬於自己嘅音樂會」。咁會唔會好似黎明咁喺中環海濱開個唱?楊立門好謙咁話自己未夠班,有歌唱就心滿意足啦!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載