› 選擇地區
三藩市
紐約
洛杉磯
其他美國地區
香港 台灣 北美
 
2016年05月18日

隔牆有耳:英女皇75年訪港
皇家警hea爆唔封路 - 李八方

75年英女皇參觀愛民邨,居民可近距離一睹女皇風采。 香港房屋委員會網站圖片

一個張德江,搞到港人怨聲載道,但凡踏足張德江嘅足迹外圍,即時遭周街警察、便衣、水馬、鐵馬包圍再包圍,「禁色」黃色、「禁物」雨傘統統不能喺張大人面前出現。
近日有網民搵番昔日「事頭婆」英女皇訪港時參觀愛民邨時,市民可以近距離一睹風采,毫無阻隔。難怪港人慨嘆,張德江擾民嘅討厭程度,就係人心未能回歸嘅原因。

網民︰皇室嚟玩命

張德江來港,擾亂港人嘅生活秩序,所到之處封路、塞車,如果錯過咗張德江如何橫掃全城,今日不妨去灣仔、金鐘、科學園親身感受。
有網民搵番昔日多位英國、美國政要、皇室貴族來港時嘅舊照對比,都不會如此擾民。有網民喺房屋署網頁搵番英女皇1975年訪港時參觀愛民邨,市民喺十步之遙排隊見到英女皇,當年嘅皇家警察亦不會草木皆兵、見人即趕。
當英女皇去到其中一層樓時,上上下下的居民仍可以望住英女皇,唔使遭趕走。另一張係前英國首相戴卓爾夫人喺1977來港參觀徙置大廈,背景可見居民晾出晒啲衫、被、盆,都係香港實況,唔會被洗太平地。英國安妮公主喺1983年去到香港仔鴨脷洲邨,成班小朋友喺安妮公主身邊打韆鞦都冇問題。
網民苦笑,或者當年皇家警察唔盡責,竟然冇紮營睇實班「暴民」,又話英女皇、首相、公主嚟「玩命」,容許平民百姓近距離接觸。香港人,仲有兩日咋,張德江就會返大陸,忍埋佢呀!

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載