› 選擇地區
三藩市
紐約
洛杉磯
其他美國地區
香港 台灣 北美
 
2016年05月13日

隔牆有耳:建制投票 絕代雙驕
林健鋒V字指 象哥叉筷子 - 李八方

立法會辯論財政預算案搞咗幾個星期,終於見到家鄉有望三讀投票,不過建制派唔知係咪個個呆坐抗拉布坐得太耐,作為投票機器嘅建制派竟然投錯票,好似前日表決407項修正案時,勞聯潘兆平就投錯贊成削減特首梁振英全年人工,不過去到財政預算案三讀投票,建制派再投錯票真係冇面見人,所以佢哋各自諗計防止再投錯。
好似潘兆平咁,八方見佢噚日好小心,搵枝筆擋住個贊成按鈕,保證自己唔會有機會㩒錯贊成支持泛民修訂,另外八方又見到,有建制議員索性用紙條貼住贊成按鈕,即係想㩒錯贊成都㩒唔到,咁做更加萬無一失啦!

兩掣同㩒包冇錯

經民聯林健鋒同八方講,佢就自創「V字」手勢投票大法,即係同時用食指、中指㩒掣投票,剛好係食指㩒「出席」,中指位剛好㩒到「反對」,實唔會投錯票喎!
而平日開會不時搵周公嘅民建聯黃定光,自言準備咗筷子去開會,不過唔係入會議廳開餐,而係用筷子代手指投票!呢個筷子投票大法有乜特別?佢話咁就唔使成日俯身向前㩒掣,用筷子篤就得!咁都諗到,八方都寫個服字,之不過呢兩日建制投咗幾百次反對票,今日預算案三讀投票,會唔會到三讀時慣咗手勢,唔覺意「反對」呢?

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載