› 選擇地區
三藩市
紐約
洛杉磯
其他美國地區
香港 台灣 北美
 
2016年04月29日

隔牆有耳:同小朋友講「行李事件係禮遇 催淚彈善良」
童言無忌︰葉劉趕住放屁 - 李八方

為咗選特首,當年梁振英都要上肥媽煮餸節目炆牛腩,爭取曝光假裝親民,同樣對特首之位垂涎嘅新民黨葉劉淑儀,早幾日上咗ViuTV節目《晚吹:一大一路》,接受5位小朋友提問,原來鏡頭背後小朋友對葉太都好唔客氣,竟然話葉太趕返屋企放屁!葉太就話小朋友天真爛漫唔介意,童言無忌吖嘛。

送朱古力答謝

繼Package Lau後,葉劉都上咗呢個由小朋友主持嘅《一大一路》節目,身經百戰嘅葉劉豈會退縮?喺節目上,葉太對住鏡頭大膽回應敏感話題,包括話蛇齋餅糭係禮貌,行李事件係禮遇,又話特首有時連基本人權都冇,何來特權?仲話警方放催淚彈係善良。做得保皇黨,葉太果然有膊頭有承擔,夠膽硬撐。
葉太噚日同八方講,錄影後因要趕返屋企,食佢最喜愛嘅黑朱古力,仲叫班小朋友估點解佢要趕住走,有小朋友就估葉太要返屋企放屁,有小朋友就估佢尿急,葉太話,統統唔係,係要趕返去食黑朱古力。葉太話齋,蛇齋餅糭係禮貌,所以佢話翌日都送咗盒朱古力多謝班小朋友。
節目上小朋友要假裝自己選特首拉票,於是鏡頭後有小朋友為爭取葉太一票,大讚葉劉︰「你好靚女呀!」葉太喺政界打滾咗咁耐,梗係清楚為咗選舉,乜嘢大話都可以講㗎啦。65歲嘅葉太回應話:「係咪真㗎?」仲大讚小朋友好醒目,成個節目一take過唔使NG。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載