› 選擇地區
三藩市
紐約
洛杉磯
其他美國地區
香港 台灣 北美
 
2016年04月20日

隔牆有耳:真‧傘兵鬧爆CY濫權
遭文匯報宰割  飛天朱︰多謝晒 - 李八方

得罪方丈,點會有好下場?相信前港區人大代表兼前立法會議員朱幼麟好清楚。呢位真‧傘兵(因為佢真係玩降落傘㗎)近日踢爆梁特喺行李門事件中有施壓,又出席集會兼喺電台同愛字堆激辯,惹嚟梁營嬲嬲豬,政界笑指佢一定被郁,估唔到咁快手箒,噚日率先由《文匯報》發功,相信以後「劏豬」報道陸續有嚟,但飛天朱見慣大場面,一於少理,仲「以德報怨」助谷《文匯報》閱讀率㖭呀!
查實呢,左報係為邊個服務?大家心中有數,唔會覺得係香港市民啩?!所以《文匯報》噚日出招咯,刊登題為〈「飛天豬」道聽塗說自取其辱〉嘅評論文章(圖),一如所料「宰割」飛天朱,包括狂鬧佢「捕風捉影,道聽塗說,為抹黑特首添油加醋,做反梁亂港行動嘅幫兇,最終作賊心虛,自揭底牌,誠信破產,自取其辱」,嘩嘩嘩,四字成語盡出,講到十惡不赦咁,目的都係一個:撐撐撐,撐梁特冇濫用特權喎(信飛天朱定左報?大家自己揀咯!)。

同朋友 傳媒 開心share

查實呢,亞瑟王李國章都講過啦,《文匯報》邊度有人睇?八方時間都好寶貴㗎,點解又會睇到?都係要多謝飛天朱,佢同八方講,知道《文匯報》好少人睇,所以噚日一早就向朋友及傳媒,傳閱呢篇文章;對於內容呢,佢唔評論嘞,只係好想講一句:「多謝《文匯報》!」
咁又係,變相幫飛天朱宣傳佢鬧梁特濫權,又真係多謝佢都嚟唔切,而呢啲幽默感,唔係人人有,難怪噚日唔少政界中人畀like呢位政壇老將。八方相信飛天朱都預咗,抹黑式攻擊陸續有嚟,但佢一於懶理,噚日飛走咗,刀來劍往使乜驚!

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載