欲加之罪，何患無辭！前日被指寧願留喺車上玩電話而唔見學生嘅教育局局長吳克儉，昨早出席活動時拋出呢八粒字，強調自己當時係用手機與同事溝通及處理公務箒，好似好有怨憤咁噃！其實吳得掂都算天跌落嚟當被冚嗰類人，任內咁多批評，都堅持捱至完成任期，懶理各方狂轟，勇氣可嘉，而且佢不停出席各類未必關教育局事嘅活動，涉獵嘅範圍真係好廣泛！
佢噚日出席「欣賞香港‧服務香港日」開展禮時，更加全情投入，除咗同在場嘅小朋友合照，獲邀selfie時亦來者不拒（嘩，估唔到佢都咁有魅力……囉！）其中有位女士舉機同佢自拍，吳得掂仲好gentleman咁，輕輕攬住對方纖腰！
Wow，到底邊位女士咁「榮幸」？之唔係仁濟醫院主席林煒珊，即係林建名囡囡。點解佢會現身？皆因「服務香港日」係由東華三院同保良局、聯合九龍樂善堂、博愛醫院、仁濟醫院、仁愛堂以及香港女童軍總會合辦，7個主辦團體喺全港籌辦多項活動，旨在為唔同階層人士送暖。
林建名囡囡︰唔係私交
林煒珊透過仁濟董事局企業傳訊部發言人同八方講，同吳克儉喺唔同情況都有見面，但唔係私交，出席活動經常都會追上潮流，影相留個紀錄，噚日亦一樣，希望大家多多關注「服務香港日」呢個正能量活動。
李八方
mailto:pf_lee@appledaily.com
