› 選擇地區
三藩市
紐約
洛杉磯
其他美國地區
香港 台灣 北美
 
2016年03月18日

隔牆有耳:公民黨壓軸神級對話
余若薇︰曾鈺成婚後開通咗 - 李八方

【《十年前後》部份陣容】曾鈺成vs余若薇

公民黨今日搞黨慶賀成立十年,佢哋製作嘅《十年前後》公民對談,由10位政界猛人分5組對談,講香港大事、核心價值、議會崩壞,唔少參與對談嘅都係獨當一面、份量十足嘅猛人。

青年軍度橋

今次對談有好大反響,好似梁家傑同田北俊對談中,提出由泛民同商界合作推舉特首候選人,呢個建議平地一聲雷,連民建聯葉國謙都暗寸田少,叫大家諗吓究竟田少係咪代表商界。咁掂嘅十人對談組合係邊個度?原來係由曾參加立法會直選、公民黨總策劃幹事余冠威提出,佢話今次陣容有吳靄儀對梁國雄、梁家傑對田北俊、關信基對黃之鋒、靚女楊雪盈對男神鄭達鴻、仲有最新一集嘅余若薇對曾鈺成「神級對話」,肯定有話題,不過要搵齊人一啲唔易,余冠威話好彩所有人都肯接受訪問,仲將原本睇落好似好悶嘅話題,帶起得好好睇。
余若薇(Audrey)同八方講,當日返立法會同曾鈺成進行呢場對談,曾鈺成開始時顯得有啲避忌,但越講越放。Audrey話離開咗議會三年幾,覺得曾鈺成變得開通咗同豁達咗,「唔知係咪佢結咗婚,佢個人都變咗。」曾鈺成亦喺對談中話,如果泛民今年9月立法會輸好多議席,社會同議會會失去一國兩制必要嘅反對力量,話對香港唔係好事。

李八方
http://pf_lee @appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載