› 選擇地區
三藩市
紐約
洛杉磯
其他美國地區
香港 台灣 北美
 
2016年03月14日

混亂舉手通過高鐵撥款 
陳鑑林憑感覺點票 曾鈺成︰符合規則

【高鐵黑洞】
【本報訊】立法會財委會在混亂中以舉手不記名方式通過高鐵196億元超支撥款,拒絕讓議員再提問、憑感覺決定較多議員支持撥款的代理主席陳鑑林昨指不同意剝奪議員發問權利,稱「唔應該連我都鬧埋」;立法會主席曾鈺成力挺陳會上憑感覺判斷支持議員較多,符合議事規則。泛民正研究提司法覆核推翻裁決。
記者:姚國雄

相關新聞:建造業2,000人示威反拉布

陳鑑林昨日於無綫《講清講楚》節目時,指自己不應該被罵:「官員或港鐵公司負責呢個工程,有錯誤嘅話係抵鬧,唔單止係反對派議員,建制派議員一樣鬧佢哋,但就唔應該連我都鬧埋。」
對於泛民指摘他刪減民主派過千項動議,禁止議員再提問,並要求新當選議員楊岳橋在表決撥款後才提問,陳鑑林認為做法無問題,「我唔同意我剝奪咗佢哋發問權利」,又指財委會上月已開20多個小時審議撥款,形容自己「維持一個有秩序、議事論事嘅議會」,並確保議員提問不重複,斥泛民拉布。政府穩袋196億元超支撥款後,陳鑑林指若議員對高鐵仍有問題想問,可在立法會鐵路事宜小組委員會和交通事務委員會跟進。

陳言論自相矛盾

陳在節目上不時自相矛盾,一時自稱不會「跟住政府條死線去做嘢」,一時又指若撥款在政府死線前未能通過,高鐵便要停工、爛尾,對香港不好,不認為自己剪布有問題:「我唔覺得(我剪布)有啲乜後果,嗰個後果肯定係好嘅後果。」
曾鈺成昨力挺陳鑑林憑感覺、認為舉手支持較多沒有問題:「憑主席嘅感覺係符合議事規則,因為主席請議員『贊成舉手,反對舉手』,主席講法係:『我認為贊成佔多數』咁就通過,我只係特別想呼籲立法會各黨派議員,唔好再令市民失望,我相信過去兩日睇到財委會開會嘅市民,都唔會同意立法會應該咁嘅現象。」

相關新聞:田北辰無舉手︰早決定棄權

曾指,作為立法會主席不適宜評論其他委員會主席如何主持會議,而且有議員或提司法覆核,更不應評論。被追問事件對議會尊嚴有沒有影響,他反問損害議會尊嚴最嚴重是甚麼?是有人舉手或是爬上主席台?是議員聽不清贊成、反對還是在會議廳用大聲公發言?他認為大家要公道,市民不會同意破壞議會尊嚴。
曾於財委會審議期間搶佔主席台的人民力量陳志全反駁曾鈺成:「當有人要入嚟打劫香港市民時,係咪佢着西裝打領呔就係有尊嚴,當我哋抗賊時,係咪除鞋上枱就係失斯文、失尊嚴呢?我相信公眾自有判斷。」
泛民正委託律師研究有否足夠理據申請司法覆核,推翻結果,但也要考慮一旦敗訴的後果。泛民會議召集人何秀蘭指,泛民票數不足,即使當日再來一次投票,撥款也篤定通過,「有幾個梁天琦喺度一樣冇用」,因為屆時主席只會趕人走然後投票通過撥款,寄語感到無力的市民在9月立法會選舉中投票,改變建制派佔多的局面,這才有望改變現狀。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載