› 選擇地區
三藩市
紐約
洛杉磯
其他美國地區
香港 台灣 北美
 
2016年02月03日

隔牆有耳:一地兩鉗 港人還拖
泛民年宵抗狼 - 李八方

一年一度嘅年宵噚日開幕,多個政黨均在維園擺檔,希望籌吓款,售賣諷刺時弊嘅年宵產品畀抑壓已久嘅市民發洩一下。其中民主黨嘅「超然鬥獸棋」率先跑出,首日去貨五分之一,賣走100盒,創意媒體部部長黎敬瑋話,反應較預期好,後悔入貨太少。
年年都係市民「影相位」嘅社民連,今年攤位整咗大白象同埋梁振英嘅「結合版」,紅衫「梁振英」由大白象嘅肛門排出,直衝大笨象糞便,頂得順嘅市民可以嚟影吓相。焦點產品係印上梁振英頭像嘅煙灰缸,一款係梁擘大個口,一款係漫畫版嘅梁除褲露股,口股並用接煙灰。本身都係煙民嘅社民連主席梁國雄話,原本想設計「肛門版」,等煙民一煙入窿,惜造價太貴放棄咗。兩款煙灰缸限量250個,每個80蚊。
社民連亦有多款tote bag出售,聽社民連馬雲祺講,首日最受歡迎係印有John Lennon頭像同經典歌詞「I'm a dreamer, but I'm not the only one」嘅tote bag。

揮春成民情指南

近日公民黨因被指「播毒」而聲明大噪,「大毒梟」黨魁梁家傑主持開幕,不斷「慫恿」市民前往「公民檔」購買代表香港人嘅本土產品,但強調該黨冇毒品可售,有嘅都係「一地兩鉗」暖手套、香港人記事簿、香港人板腦袋等。一如以往坐鎮寫揮春嘅主席余若薇話,今年如常落區寫揮春,向來市民想佢寫乜都係民情指南針,今年最多市民要求佢寫「香港加油」,證明港人唔想見到香港墮落下去。
工黨就售賣「香港人還拖」嘅人字拖,仲有寫上多個為港人熟悉字詞嘅環保購物袋,包括「勿忘初衷」、「我要真普選」。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載