› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

政壹花生友:
張炳良兩地兩檢論掀風波 - 花生友

特首梁振英講明高鐵非一地兩檢不可,但運房局局長張炳良近日竟話臨界點時可以兩地兩檢。

高鐵追加撥款到底可唔可以喺3月死線前表決呢?觀乎𠵱家嘅拉布戰,機會極低噃。其實呢單工程項目焦點已由原先嘅超支問題變成一地兩檢,尤其銅鑼灣書店股東李波失蹤案,更令呢樣嘢受市民關注,而喺呢個時候,運輸及房屋局局長張炳良竟然話臨界點時可以兩地兩檢,港鐵中人聽到,肯肯定不知如何是好,有建制中人更指,此說好容易搞歪件事。
特首梁振英去年兩度話呀,兩地兩檢不可行,由此已經睇到高鐵非一地兩檢不可;據花生友所知,其實相關部門都有同內地商討,假若實行一地兩檢,如何是好?點知喺呢個磋商期間,張炳良竟然講到唔排除考慮兩地兩檢,有建制中人話,如果一早可以兩地兩檢,又何須搞到今時今日咁嘅地步?

恐建制未必齊腳撐撥款

佢哋認為兩地兩檢一大問題係,高鐵屆時只變直通車,起嚟仲有乜意思?所以政府以致港鐵內唔少人,都對張炳良此說好驚訝,尤其完全唔知乜嘢叫做臨界點囉,有人心中十萬個不解,亦有人甚至話對張炳良向泛民屈服憤怒㖭喎。
若然硬要喺財委會表決高鐵撥款方案,建制派確實係較為人多,假若坐定定就冇乜意外,問題係今年係選舉年,乜都可以成為對手攻擊議題,據聞政府𠵱家都好驚,一旦真係有機會表決撥款,建制派係咪肯齊腳投支持?有立法會議員仲透露,最近張炳良都約見過佢哋,言下之意都對通過撥款不表樂觀,若然政府都打定輸數,打場大戰,唔通提早收皮?港鐵嗰邊,唔知又有冇乜計仔?

花生友
周二、四刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載