› 選擇地區
三藩市
紐約
洛杉磯
其他美國地區
香港 台灣 北美
 
2016年01月28日

隔牆有耳:稱來自養殖場 唔怕被狙擊
穿國貨皮草 葉劉:同食牛肉一樣 - 李八方

香港早幾日寒流來襲,掀起一陣上山「追冰」潮,不過噚日溫度升番唔少,已見雙位數,但新民黨主席葉劉淑儀出席立法會會議時,都出動到皮草大褸。嘩,唔驚啲動物權益組織狙擊咩?葉劉話喎,來自養殖嘅mink,其實「同食牛肉一樣」。咁講即係冇有怕咁噃!

稱意大利設計廣州製造

查實葉劉呢身闊太打扮,噚日都幾搶眼,路過嘅獨立議員黃毓民見到,都忍唔住問佢:「你嘅皮草真定假?」葉劉自己解謎話係堅,原來身上呢件係國貨,係佢十幾年前仲做緊保安局局長時,喺哈爾濱睇冰雕時買㗎。雖則喺大陸買,但葉劉強調件褸係意大利設計、廣州製造,形容係國際貿易嘅示範嚟嘅,仲透露當時一擲萬幾蚊人仔買㗎!
查實保護動物權益嘅組織已經一再指出,將野生動物圈養取毛係唔人道,為咗唔損害皮毛嘅完整,剝皮嘅方式都非常殘忍,但葉劉就覺得,皮草嚟自養殖嘅farmed animals、其實同食牛肉差唔多喎!
八方問過自由黨紡織及製衣界議員鍾國斌,佢就話𠵱家大部份皮草都係農場養,而過往皮草需求最大嘅地方係俄羅斯,但近年當地經濟差咗,中國需求反而大咗。至於香港咁嘅天氣使唔使着皮草呀?佢話喎,始終有啲闊太鍾意嘅!

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載