› 選擇地區
三藩市
紐約
洛杉磯
其他美國地區
香港 台灣 北美
 
2016年01月15日

隔牆有耳:鬍鬚曾寫紙仔
「握手」要mark低 - 李八方

其實呀,方丈幾小器,係人都知;激親佢,真係要睇路!偏偏人稱大嚿嘅人民力量陳偉業呢,又要喺特首答問大會提起CY傷心事。查實邊個香港人唔知,國家主席習近平去年專登同財爺曾俊華握手,係明顯話畀CY聽,佢唔係下屆唯一欽點特首呢?大嚿舊事重提,真係曳曳,為乜要令CY無地自容呢?
大嚿提起此事之際,八方望一望同場嘅鬍鬚曾,只見佢一臉木然,冇流露任何感情。
嗱,呢啲咪叫做生存之道囉,否則仲點可以成日寫blog生龍活虎?而喺CY回應議員質詢期間,鬍鬚曾好專心㗎,仲喺一張紙上寫嘢喎,寫乜呢?錯錯錯,梗係唔係狂寫「一帶一路」,而係逐一寫上提問議員名稱,以及佢哋提問嘅概要。而喺第10位發問嘅陳偉業名字旁邊,鬍鬚曾mark咗兩粒字:握手。咦,好明顯佢真係有留心聽大嚿發言,冇扣到料喎!查實落筆時,鬍鬚曾到底有啲乜感受?
鬍鬚曾去年到北京出席亞投行成立儀式而獲習握手,佢今日又飛北京,以中國代表團成員身份出席周六舉行嘅亞投行開業儀式,周日返港,唔知呢次有冇領導人再送握手呢?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載