› 選擇地區
三藩市
紐約
洛杉磯
其他美國地區
香港 台灣 北美
 
2016年01月15日

隔牆有耳:大嚿舞「蠟」槍頭
嘲CY正「銀樣」 - 李八方

陳偉業攞出標槍道具抗議,保安即上前攔阻,最終大嚿被驅離會議廳。馬泉崇攝

特首答問大會都算係學好中文嘅地方,除咗長毛同曾鈺成不時吟詩作對,借古諷今,去年10月梁振英亦引用毛澤東詩句「牢騷太盛防腸斷」回應黃毓民提問,等大家增進中文。噚日答問大會,大家又有收穫嘞;「銀樣蠟槍頭」係乜東東?原來係講得個樣、冇鬼用。話緊邊個?咪就係CY囉!
人民力量陳偉業喺答問大會上援引《西廂記》一句「銀樣蠟槍頭」,批評CY喺施政報告洋洋灑灑3,000幾字寫「一帶一路」,其實只係中看不中用,諷刺施政報告只係「禍港報告」,冇乜點提香港核心價值同廉政,猶如「銀樣蠟槍頭」,其後又攞出一支標槍道具抗議,最終同聲援嘅黨友陳志全,一齊被立法會主席曾鈺成驅離會議廳。

源自《西廂記》 錯解「鑞」字

據作家李碧華喺本報專欄所講,「銀樣蠟槍頭」出自《西廂記》同《紅樓夢》中一句「你原來是苗而不秀,呸!是個銀樣蠟槍頭。」諷刺他人「外表好看,實際上中看不中用」。蠟其實是「鑞」,指「焊錫」,全句即係話:用焊錫製成槍頭,樣子看似銀製,但其實不如精鋼槍頭般管用。
大嚿都有用自己嘅方法解釋:「槍頭用蠟做代表軟弱無力,外表睇落好似好剛強、堅韌有威力,但蠟槍頭乜都做唔到,係無能,有人用嚟形容男士」,所以佢製作嘅道具,喺管道頭放咗一支蠟燭。但其實銀樣「蠟」槍頭係字誤,冇咗「鑞」焊錫之意。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載