› 選擇地區
三藩市
紐約
洛杉磯
其他美國地區
香港 台灣 北美
 
2016年01月11日

蛇齋餅糭中央化的施政報告
(添馬男) - 添馬男

梁振英即將發表新一份施政報告,圖為去年施政報告記者會。資料圖片

新一份施政報告即將發表,梁振英走數再次成為新聞,為減低負面影響,近日親建制媒體已紛紛搶先披露派糖措施,最新一筆是五億成立農業園,受益者當然唔會係馬寶寶卓佳佳、菜園村東北社運,而是漁農界班選委,相信為了連任,689可以去到好盡,乜嘢都搞個派錢基金,將蛇齋餅糭中央化、政策化及常規化。由於特首超然,大權在握,內部難以制衡,傳統以來財政司及庫務局在內部的財務監察角色已被廢,今年是派錢攞選委票尾班車,尤其是漁農、勞工等篤定建制派鐵票倉,所以一定有咁盡去咁盡。

優惠業界 公眾無得益

有政治目標的民粹施政,不代表可以令社會大眾受益,因為派錢或優惠業界,普羅市民沒有得益,幾年來大大小小的基金、優惠、補助,成效點有目共睹。由於689爭取連任,表面上用短期利益可以換來支持,亦可乘勢掩飾民生政策的失敗,但實際上條數就唔係咁計。
四年下來其實政府派咗唔少,為何民望仍然低殘,香港所有經濟數據表現亦唔差,為何市民條氣就係唔順?講到尾,就關乎市民對689及整個建制不信任及厭惡感。這班業餘政客水平猶如街市大媽,𠵱家唔係講元秋、洗頭星及Tree根,而係689、林鄭、吳得掂、劏房波等一大棚口不擇言,以為tough talk等如有形的政客。為政者不在多言強辯,如市井之徒,但今屆作風就是以為口頭強硬、拗贏你就等於勝利。689當日在立會答問將老人院虐老強辯為土地問題,受市民嘲笑至今,吳得掂促銷自己年讀三百本書,卻缺席TSA公聽會去日本賞紅葉,林鄭「官到無求膽自大」、「天堂留定位」等白癡可笑言論,在在加深市民對政府的厭惡感。
今時今日,市民亦唔易受政客宣傳所操縱,政客表面有權巴巴閉,但今日人人有傳媒平台在手,意見領袖眾多,已經不是《南早》、《信報》、TVB、港台商台總編台長幾條友控制得到,若不小心言行,行使權力,政策出台深思熟慮,細心經營,一定會被人抽秤、嘲笑,而厭惡感就由此而積累。如果真係爭取民意,就唔好用花招,按照清晰施政理念,排除萬難去實現政策,做到一單標準工時,好過派十億畀某界別,或整色整水的勞工福利。
當前民生施政三大承諾,強積金對沖安排、全民退保、標準工時究竟終局如何,做、不做?今年終究要有個說法,已不能再研究拖延。任期已快完,還有一年就已選下屆,𠵱家唔清楚交代走數定堅做,你叫人支持你選下屆特首,儍的嗎?相信連陳婉嫻都好難再落叠,而更甚者,一旦689走數,會令整個建制派今年立法會選舉飽受攻擊,泛民將施政失誤全部隊晒落民建聯、工聯會身上,𠵱家邊個仲敢企近689?

添馬男

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載