› 選擇地區
三藩市
紐約
洛杉磯
其他美國地區
香港 台灣 北美
 
2015年12月31日

隔牆有耳:CY發童子功起跑 吳得掂衝線冇執書
2015膠棒接力賽 - 李八方

一隻麒麟加上葉劉淑儀,唔少人今年笑住開年。以為笑一陣就冇?點知好戲在後頭,局長高永文落區幫手sell政改,點估到推銷會變成爆seed,民望高原來都有霸氣一面。但呢場舌戰始終無補於事,建制派等埋發叔,政改甩轆全城joke;習近平似乎冇眼睇,搵曾俊華金手一握,造就全年人氣天王。鐵醫盧寵茂其後跌倒噃,唔通有心同習握手搶鏡?但都唔及得齊昕扮鬼摑阿媽,以及Tree根變輸根震撼全城。2015年接連有笑彈,八方幫大家回顧慢慢歎。

CY五歲童 老是常出現

特首梁振英今年1月發表施政報告,無厘頭炮轟港大學生會刊物《學苑》搞港獨,當然笑大人個口,但亦有另一個焦點,令人啼笑皆非,就係點解佢身邊有小朋友「老是常出現」?CY聲言有個「5歲小朋友」問佢大個咗住邊?香港仲有冇足夠土地?司馬昭之心,路人皆見,政界話佢講大話,根本係想開發更多土地建屋,工業界林大輝公開話小朋友根本係「虛構」,衞生服務界李國麟則喺答問大會靚抽,話呢位5歲童問過佢香港仲有冇學術自由!

麒麟撞葉劉 贏家係啤酒

新一年,人人都想有個好開始,新民黨主席葉劉淑儀喺年初二,跟咗時任鄉議局主席劉皇發嘅大隊,去車公廟求籤開年。可能葉劉唔多識鄉事習俗,入廟時企正麒麟隔籬,結果被麒麟撞飛,好在有人扶住而冇受傷。呢一幕成為政商界拜年嘅茶餘飯後佳話,仲帶挈埋麒麟啤熱賣!但呢場大龍鳳唔係就咁就完咗喎,坊間紛紛猜測麒麟係有心定無意㗎,結果葉劉獲安排同麒麟師傅見面,握手釋前嫌,唔知葉劉有冇約定麒麟,明年初二車公廟再相見?

政改堅離地 預咗衰收尾

落區接觸市民,原來可以唔落地㗎。係咪好離奇?係堅離地至真呀!話說由政務司司長林鄭月娥、律政司司長袁國強同政制及內地事務局局長譚志源合組嘅政改三人組,4月開始落區諮詢政改,但全程留喺巴士上冇落過車,只係不停同地上嘅市民揮手。乜佢哋齋揮手已經收到市民聲音?哦,原來係驚被狙擊,咁離地嘅政改,最終由「2017一定要得」變得個吉,意料中事。

被指呃細路 民望高爆seed

政府推銷政改期間,大家發現,原來食物及衞生局局長高永文好talk得。皆因佢落區hardsell政改期間,遇上反對袋住先嘅大叔,被對方一輪轟炸又鬧佢呃細路,民望高終於嚟料,展現平時少見嘅一面,爆seed反駁,高潮結尾一句︰「講完!」簡潔霸氣,熱爆全城,個個都掛口邊,成為實用結語詞。呢次動真氣並冇令民望高支持度下跌;對住大叔毫不退縮,但年尾卻「衰」喺一個細路手上,喺跑步活動中被絆倒好陰功豬,面部受傷嘅佢要休息兩星期,八方都希望明年佢順順利利。

建制甩晒轆 死貓贈發叔

全年爆笑大事,政改投票甩轆一定冇得輸。雖然喺泛民堅拒袋住先嘅情況下,三人組得個吉係意料中事,但又點會有人估到,最後竟然係28票反對、8票贊成下壓倒性否決政改呢?成班建制派喺表決時拉隊離場,話要等埋發叔,殊不知有啲黨派唔聽指令,有啲盟友唔明做乜,坐定定喺度,結果拖延戰唔成功,反變國際大笑話。建制派係咪有人要問責?從佢哋WhatsApp嘅流出對話,揭露有人指揮不力,證明同陣營都有人不滿。

獨中習握手 財爺聲價高

梁班子嘅民望,唔使八方多講,大家睇港大民調都心照!但一眾司局長中,卻有一位一枝獨秀。唔知係咪得民心,令國家主席習近平都另眼相看?明明係亞洲基礎設施投資銀行(亞投行)嘅活動,在場嘅其他成員國代表都好有地位,但偏偏習近平走入會議廳接近代表時,卻眾裏尋他刻意走去財爺曾俊華面前同佢握手,呢一握令鬍鬚曾身價急升,選特首行情更加看漲,而獲金手護身嘅鬍鬚曾其後表現更奔放。

校委「錫晒」陳文敏 阿茂跌倒「無人問」

政改甩轆後,市民都想休養生息,偏偏梁特要市民永無寧日,無端將兩個問責局長炒魷,根正苗紅嘅前民政事務局局長曾德成及AO出身嘅前公務員事務局局長鄧國威,因為唔係自己友而無得留低。愛國同公僕圈子嬲到震,梁特懶理繼續搞搞震,夾埋梁粉力阻陳文敏任港大副校長,港大校委會從此風波不絕,但事件卻令大家發現,校委鐵醫盧寵茂身同心都好易受傷,喺「等埋首副」會議當日,學生衝入會場時阿茂受傷抱膝倒地,事後更因陳文敏冇致以問候而反對對方出任副校,有網民更發起問候阿茂大行動。無論抽水或插水,都令大家笑中有淚。

田毛毛出世 抽水成大勢

自由黨榮譽主席田北俊抽水真係有一手,佢個facebook以狙擊689為目標,代唔少市民出一口氣,難怪獲爆like。唔少人讚田少fb抽水抽得快又準,原來都係靠幕後功臣,就係田毛毛嘞!8月時葉劉fb管理員Eric Chan晒葉劉腸照晒到私隱都洩、搞到一鑊粥而致歉;田毛毛乘勢抽擊,話由於處理fb太出色、太多like令田少造成困擾而向對方道歉,再次顯示網上功力;及後又有田少騷「老鼠仔」等呃like佳作,真係想唔紅都幾難。

齊昕摑母親 話唔係親生

梁齊昕幾乎月月有新料,令全城極度關注。年初話要拍戲登大銀幕,但處女作因為疑似有啲鹹味而被stop,銀色旅途終止,可能因此更加鬱結,一度喺禮賓府嗌自殺兼報埋警,喺露台嗰張傷神相,認真我見猶憐。之後有段時間齊昕嘅fb同ig好平靜,大家都懷疑佢係咪離咗境。直至萬聖節,肯定佢未改壞脾氣,事關當晚佢扮成女鬼喺蘭桂坊出沒,帶醉下爆粗鬧的士司機,梁太收call後嗱嗱臨出動接女返屋企,點知竟然被兜巴星,仲被阿女話唔係親生。

Tree根被拔根 話要起番身

小鳳姐今年11月好鬼忙,皆因區選爆出唔少大冷,除咗傘兵突圍,唔少老將亦被踢走,民建聯兩位雙料議員包括葛珮帆同鍾樹根,分別喺沙田頌安以及東區漁灣失守,尤其係Tree根被最後一日先報名參選嘅徐子見擊敗,最震動人心,有網民響應號召到「輸根」地區辦外熱烈地彈琴熱烈地唱,反而激發咗「輸根」鬥心,佢話邊到跌低就邊到起番身,來屆區選再戰。

月讀三十本 克儉愛日本

年尾坊間掀起史無前例嘅閱讀風氣,都係多得教育局局長吳克儉。佢接受元秋網台訪問時聲稱,一個月可以讀30本書,惹嚟各界譁然,原來佢嘅書係計埋雜誌,但呢個閱讀習慣已經夠晒經典,點知因為學識淵博惹人發笑後,佢又有另一佳作,就係寧願去日本睇紅葉而唔出席TSA聽證會,又向學生推介日本好玩之旅,好正啦好食啦真係好正㗎!最後仲報警拉記者㖭,都令大家笑中有淚。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載