蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月27日
馬上成為壹會員

時裝設計師搖籃
特色布市場快被消失?

位於欽州街的布市場「棚仔」落實重建,引起外界迴響。過去一個月,文化人藝術家以致深水埗老街坊,無不聚首棚仔。街頭花生騷、cosplay、藝展……聖誕期間,差不多每日都有活動,就是國際媒體也採訪,關注這個孕育幾許時裝設計師的港產草根布市場何去何從。「不止是歡送、懷緬,食埋最後一個蛋撻,而係希望藉連串活動,引起關注,帶來改變」。習慣用鏡頭抗爭、正為棚仔拍攝紀錄片的獨立創作人盧鎮業說。 
記者 呂麗嬋 攝影 馬泉祟

名為「棚仔花生騷之似水流年」的活動,明天(27/12)舉行。8個設計師來自時裝界老中青三代,既有獨當一面的品牌設計師,也有學生。棚仔購入布料,以「似水流年」為主題原創服裝,請來模特兒行貓步巡遊,為被迫遷的布販打氣。花名小野的盧鎮業,是聲援的中堅,「大家都關心棚仔的去留,網上召集,一拍即合」。由顧客變身一份子,拿起最熟悉的攝錄機,追蹤棚仔的前世今生,陪布販與政府開會、示威,用影像紀錄,期望改變。
「以前覺得呢度似迷宮,過去大半個月日日嚟,體會到呢度嘅獨特性同人情味」。記者是陌生過客,坐在門口麻雀枱5分鐘,四方八面的食物湧至:熱辣辣甜粟米、拜過神的桔仔,還有古早味椰子糖。時光像倒流,回到童年時。「隔籬檔口出去一陣,掛個牌,留個電話,街坊就識自動波幫眼睇檔」。布販何太說。「政府叫我哋走,邊有得反抗?不過有班後生陪住,嗰心就定好多」。82歲的東叔笑咪咪搭訕。
「政府容不下家庭式小本經營,唔係領展就係連鎖店。見你嘈、反抗,就變做另一個西港城,最叻係咩都博物館化」。正與街坊打牙交的小野憤憤不平。2010年城大創業媒體系畢業,愛拍社會民生議題庶民生活的小野,是電影節常客,「一直相信影像的力量,除咗紀錄,亦有推動力,可以令唔關心的人變得關心,猶豫緊撐唔不撐的人,行出嚟參與」。
2012年拍下洗碗工故事《金妹》,他乾脆跑去做侍應。翌年獲藝發局頒「藝術新秀獎(電影)」,正值碼頭工潮如火如荼,血氣方剛的他上台領獎,夠膽死找來碼頭工人同台發難,控訴政府不力,令主辦單位大感尷尬。去年中,又自資製作短片《真‧警察故事》上載到Youtube,重塑反東北撥款集會後5名示威者在警車上被毆的一幕,引發警方要求谷哥下架疑魂,登上報章頭條。
在社會運動上愈走愈前,小野直言,小時候並不關心時事。「03年沙士我考會考,見到50萬人上街,會話政府根本唔會聽,行嚟有咩用嗰種人」。09年六四20週年,是轉捩點,「嗰時報紙日日有回顧特輯,順理成章,畢業前拍咗段關於六四的短片,關心多咗,之後反高鐵、政改同五區公投,對我影響好大,亦開始搵到電影同社會的關係」。
2010年,反高鐵浪潮席捲。「嗰時我幫一套商業片做收音助理,每日開18個鐘,放工去聲援,好辛苦。我最記得通過嗰一晚,喺個山莊開工,嗰晚仲要係勁歌金曲總選,林峯唔知攞咗個咩獎,好多星喺度睇,完全無人講高鐵,佢哋未必都係政治冷感,但當你日日開工18個鐘,沒日沒夜,好自然與世隔絕」。詭異的平衡時空,他看到社會真正所需,決意全身投入社運,又自資拍攝紀錄片,做自己愛做的事。
「上年最慘,租都交唔到,日日只夠錢食一餐,唯有去餐廳打咗幾個月工,都話青年貧窮嚴重」。他自嘲似的說。雖謂如此,這個12月,他又投入棚仔重建運動,與志同道合朋友全力聲援,盡最後努力,「社會事件正在發生,你永遠要同佢鬥快,但我成日提醒自己,唔好忘記當初拿起攝錄機的初衷」。他說。

82歲東叔見證棚仔故事

鐵皮搭建的簡陋屋頂,縱橫交錯似迷宮。俗稱棚仔的欽州街臨時布市場,建於1978年,至今有38年歷史。四五個籃球場大小,將改建為有200單位的居屋,40個經營者臨迫遷。82歲的陳如東,年紀最大,見證棚仔「臨時了38年」!「未嚟棚仔時,喺汝州街賣布,同張家輝嗰老豆係街坊,後來建地鐵,先搬過嚟,以前呢度好荒蕪,後面係軍營同難民營,連樹都係商戶自己種」。名符其實的開荒牛,布檔經歷四次大火,一步一腳印。
「廿年前嗰次燒通頂,次次都係晚頭先起火,諗起仲驚」。大東布業是老字號,也是東叔的心血,讓他養大四個孩子大學畢業。60年代,製衣業黃金時代,新蒲崗、青山道,製衣廠林立,東叔說工廠用剩的材料,就疋頭店接收,深水埗成了集散地,成行成市。「有得做梗係希望繼續做,一班街坊,感情好好,又住喺附近,大家都希望可以原區集體安置」。
棚仔也是孕育時裝設計師的搖籃,「年年都有老師帶學生嚟買布,有啲畢業之後都會嚟探我」。由客人變為忘年朋友,昔日學生妹長大成人,東叔獲邀在畢打街穿上潮服,權充長者模特兒。「個女仔以前成日喺呢度買布,聖誕節佢話會過嚟探我,等我著番佢造嗰件衫威吓」。滿戴溫情的小社區,大有可能渡過它最後一個聖誕,已是別離時。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載