蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月27日
馬上成為壹會員

區會過氣小花嘆被街坊嫌老

【本報訊】今屆區選,一張張小花面孔成為話題,落選的過氣小花亦隨明年新一屆區會任期開始,步入歷史。1999年,民協也有一位5呎9吋的小花莫嘉嫻,一擊即中,贏足四屆。一個女子守着一個老區,奉上芳華正茂16年,上月卻以45票敗於民建聯的「鄰家男孩」。43歲的莫嘉嫻感嘆,街坊昔日談政績叫她莫姑娘,今日卻更着眼福利嫌她老。
1996年,民協廖成利帶着莫嘉嫻來到九龍城馬頭圍邨作開荒牛:「當年啲街坊好鍾意我㗎,莫姑娘前、莫姑娘後,因為佢哋鍾意咁叫。」1999年,莫升格做議員,她那年27歲。現為民建聯主席的李慧琼,亦在當年以25歲之齡,於九龍城土瓜灣北當選至今。
由27歲做到43歲,這16年,莫嘉嫻由未婚到35歲結婚、36歲第一胎至如今為兩女之母,馬頭圍邨見證她漸變中年婦人:「當年我請啲街坊觀禮請飲,到𠵱家有啲街坊仲將我當年結婚同佢哋嘅合照,放喺屋企最正中位置。」
一條老邨放棄如「新抱仔」的議員,需要多大力氣?今屆民建聯改派24歲「鄰家男孩」邵天虹,同時續派蛇齋餅糭,她續與街坊談老邨重建,街坊這次不再介意對手連區內問題都不懂答:「街坊覺得佢好似自己個孫,區內會有人話,莫嘉嫻都老啦,畀個機會後生仔。」

支持者哭:以後點算

莫嘉嫻落選後欲哭無淚,卻在謝票痛哭時,一位定期找她幫忙填表格的女街坊擁着她哭喊:「以後點算呀……嗰下我都頂唔順,我攬住同佢一齊喊。」其後又有幾個男士走入其辦事處:「為我喊嘅人,男士多過女士,啲阿叔仲激動,一衝入來失控不斷喊,佢哋估唔到(選舉結果),覺得唔抵,不斷話啲婆婆轉軚,一路喊一路講粗口,話啲阿婆見異思遷。」
中年婦人失業,她沒太多愁緒,惟一談到女兒便哽咽:「選舉期間,我兩個女都病咗,細女得歲幾,嘢又唔食,奶又唔飲,但我冇時間理佢……我選唔到,我6歲個大女同我講『媽媽,你知唔知點解細妹唔食嘢,唔飲奶?因為你唔喺度,我哋成家人食飯食得唔開心,𠵱家你返番嚟,我哋食飯好開心,阿妹肥番晒』,跟住我就喊。」
老巢放棄自己迎接民建聯,莫嘉嫻說,就讓街坊感受一下民建聯的處事作風。至於4年後會否捲土重來,仍是未知數。
■記者姚國雄

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載