› 選擇地區
三藩市
紐約
洛杉磯
其他美國地區
香港 台灣 北美
 
2015年12月21日

隔牆有耳:
喇沙晚宴講教劍心聲 
財爺愛俾𡃁仔糟質 - 李八方

財爺曾俊華噚日喺網誌話,聖誕假期會喺屋企「閉關」準備明年嘅財政預算案,上周五仲同幾十名中學生會面聽意見。身為喇沙書院舊生嘅鬍鬚曾喺閉關前夕,前晚出席喇沙書院舊生會晚宴,致辭時不忘搞爛gag本色。
擅長劍擊嘅鬍鬚曾話呀,1995年開始返母校教劍,自己應該多謝喇沙喎,因為過去30年喺政府5天半工作,周六下晝回校教劍當做運動:「唔單止可以教吓劍,仲可以俾班𡃁仔糟質吓,呢個都係人生樂事」,惹起全場哄笑。
佢同時不忘認叻,話喇沙劍擊隊過去30年攞咗11年總冠軍,全場梗係拍掌叫好,當中以2011年成績最好,喺重劍、花劍、配劍三個項目都係學界第一名。佢話同一班師兄回校教導一班師弟都係唔收人工:「所以學校要炒我哋魷魚都係有一啲難度。」

話後生過費sir 冇計劃退休

喇沙死敵係男拔,鬍鬚曾若有所指話:「有啲學校,唔講名啦,為咗贏我哋,乜都做得出,最近我喺facebook見到一句好好嘅說話,叫做『拔他校之萃』,形容得非常之貼切,但喺我喇沙係唔buy呢一套,咁多年嚟喇沙精神都係8個字:真材實料,不假外求!」口甜舌滑,全場old boys點會唔拍掌?喺fb經常呃like嘅男拔舊生田北俊,有冇還擊之意?
下年就65歲嘅鬍鬚曾話,近年成日俾人問佢有冇計劃退休:「我嘅答案好簡單,我冇計劃退休。費格遜都教到71歲,我同佢比,我好後生箒!」講到咁,唔通想選特首?

李八方

MAILTO:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載