蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年12月07日
馬上成為壹會員

隔牆有耳:
成立41年來首次 
廉署搞比賽 一人一句反貪 - 李八方

【70年代】
當年市民擔心報復而唔敢舉報貪污,廉署於是推出「廉署保密 密密實實」嘅宣傳標語派定心丸。

近年網民喺網上創作過唔少啜核調皮嘅標語同icon標記,大受歡迎,廉政公署眼見坊間創意無限,亦決定舉行成立41年來首次標語同標記創作比賽,希望有既能迎合時下社會、又能傳承廉潔反貪核心價值嘅標語同標記,甚至吉祥物。
廉署社區關係市民諮詢委員會主席梁智仁同八方講,廉署1974年成立至今,先後創作過唔少經典、令人印象難忘嘅宣傳標語,好似「廉署保密 密密實實」、「早知結果 何必當初」、「香港勝在有你同ICAC」等;80年代嘅坐監宣傳海報更收阻嚇作用。

着重原創 惡搞未必接受

而今次首創嘅標語同標記比賽則分青年組(25歲或以下)及公開組(25歲以上),主題係「全城˙傳誠」一人一句撐廉潔,其中標語創作字數不可超過30字(不包括標點符號),中、英或中英文並列均可;標記創作包括任何形式嘅抽象設計,或任何人物或動物宣傳造型,以繪畫或彩色打印方式均可。

廉署會邀請廣告界、設計界專業人士同部份諮詢委員會成員組成評審團甄選,各組首5名入圍作品均有機會獲廉署採用作倡廉活動。廉署社區關係處助理處長陳潔雲強調,比賽着重原創兼顧及廉潔誠信,作品不可涉及侮辱同粗言穢語:至於接唔接受二次創作或惡搞作品?就由評審團決定。八方覺得呢,收咗UGL公司5,000萬而仲未去廉署飲咖啡嘅特首梁振英,不失為反面宣傳廉潔嘅好人選吖,唔知廉署會唔會破格考慮?參賽截止日期係明年2月15日,詳情可瀏覽 http://www.icac.org.hk/icac/slogan/ 。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載