› 選擇地區
三藩市
紐約
洛杉磯
其他美國地區
香港 台灣 北美
 
2015年11月24日

隔牆有耳:金童玉女戰區選一擊即中
公民黨狄易達 民主黨李英愛 人氣爆燈 - 李八方

曾素麗話特登學句韓語「多謝」回覆支持者。

區選塵埃落定,傘後組織有成員突圍之際,泛民政黨亦有唔少新面孔上場。其中最矚目嘅係一對金童玉女,就係喺東區丹拿撼贏自由黨嘅公民黨鄭達鴻,以及喺馬鞍山富龍選區擊敗地頭蟲嘅民主黨曾素麗,前者被指似狄易達、後者則有李英愛稱號,兩人勝出後成為網民新寵,人氣爆燈,勝過唔少民主舊將。

婆婆爭同小鮮肉握手

「真人仲靚仔過上鏡喎!」被認定係型版狄易達、公民黨青年公民主席鄭達鴻,梗係喺街上都聽過類似嘅街坊評語。笑容非常可掬嘅佢話,好感激丹拿選民畀佢呢位27歲嘅新丁,一個服務社區嘅機會,噚日朝早落區謝票,唔只年輕人、仲有好多中年夫婦甚至婆婆同佢握手。
原來阿達嘅屋企人同親戚,噚晚深宵都喺票站留守,陪佢見證歷史時刻,不過暫時都未安排慶功宴住,遲啲先再算。八方發現佢拉票拉到好似瘦咗?阿達笑笑口話係「削咗」,睇嚟佢稍後都要食多啲嘢補番多啲小鮮肉。
27歲嘅曾素麗因為貌似韓國藝人李英愛,喺區選時人氣急升,最終仲成功打大佬,好多粉絲都替佢高興。曾素麗話呀,落區真係有唔少人直接叫佢李英愛,佢都特別學咗韓文版「多謝」嚟回覆,同街坊好有互動。但笑笑口話,唔係因為靚樣致勝,「𠵱家又唔係選美」,相信街坊都見到佢過去兩年來,喺區內都有落力工作;加上選民確實有求變精神,所以都畀咗機會佢。點票之時,曾素麗冇想像中咁緊張,「因為選舉工作由早至晚,已經好攰」,最終得知勝出都有眼濕濕;噚日成朝則收到街坊來電恭賀,晚上就同區內支持者食飯嚟個小慶功。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載