蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年11月23日

隔牆有耳:
由選美場殺入區選 
3條Queen鬥密實 - 李八方

選美同選舉,只差一線,但有一樣好唔同,就係唔使着泳衣露事業線!今屆區選至少有三名選美出身嘅女將,殺入區選戰場,包括喺南區香港仔選區首度出戰嘅「哈佛小甜甜」港姐任葆琳,再戰南區海怡西嘅人力主席港姐袁彌明,以及喺葵青區青衣邨參選嘅中國小姐趙哲妤,佢哋全部以行政look登場,事業心呢樣嘢,確實係用行動而唔係用衣着證明。

袁彌明不停被集郵

2005年殺入港姐五強嘅袁彌明,呢幾年已經轉戰政界,現為人民力量主席!
其實選舉對佢嚟講輕而易舉,除咗早年競選過立法會議員,去年亦參加過南區海怡西補選,輸咗嘅佢再接再厲,今屆再戰海怡西,同新民黨陳家珮撼過。
袁彌明喺選舉日,揀咗白色外套上陣,戴上代表人力嘅黃色肩帶,佢咁解釋呢個配襯:「淺色啲,光鮮啲……條褲(黑色間條)就冇乜去諗,總之袋到個電話就得。」
八方見佢非常受街坊歡迎,不停被集郵;海怡東選民「事旦男」,都自製紙牌撐佢。

任葆琳嫁畀香港仔

97年選港姐打入五強、有「哈佛小甜甜」之稱嘅任葆琳,出戰香港仔選區,雖然係處女戰,但佢話過去一年用咗「最老實、最笨」方法拉票,以超過2,000小時服務社區。
昨一身行政look落區,sell專業同自主嘅任葆琳話,覺得選區議員比選港姐自主好多,因為可以用獨立身份做事。
政界流傳該區上屆區議員黃靈新,今屆唔選全力支持佢,因兩人有「曖昧關係」,任葆琳聽完即爆笑:「開玩笑啦!佢太太好靚㗎!」佢強調選舉係自己畀錢,同時笑指︰「算啦!我嫁唔出㗎啦!嫁畀香港仔囉!估唔到最終係呢個香港仔 (選區)囉!」

趙哲妤嗌咪俾人蝦

2010年中國小姐香港賽區冠軍、並於總決賽奪得季軍嘅趙哲妤,今屆區選首次下海,出戰青衣邨選區,仲自製螢光牌做最強拉票武器,以便青衣邨選民無論日與夜都記得佢。佢話昨晨5點已開始準備選舉工作,化個淡妝,穿上深色連身套裝,以OL斯文look示人,再配上一對舒適平底鞋,拉票認真冇難度。
靚女有着數啩?趙哲妤同八方呻,話被人蝦豬豬,有人趁佢拉票,用大聲公掩蓋佢把聲,又搵兩個大漢「挾持」佢,逼佢走咁款。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載