› 選擇地區
三藩市
紐約
洛杉磯
其他美國地區
香港 台灣 北美
 
2015年11月12日

隔牆有耳:傳高官收禁波令 兩人11.17咁啱飛咗
財爺、劉華冇得撐港隊 - 李八方

下星期二(17日)香港主場上演世界盃外圍賽中港大戰,之前球迷撲飛已經引發好多不滿,到比賽嗰日,中港矛盾誓成比賽焦點,江湖流傳因為呢場波太敏感,政府高層下令司局長最好唔好入場睇波,仲話免得過唔好隨便表態撐邊隊,朝中屆時至少有財爺曾俊華同劉江華「咁啱飛咗」,但有建制中人建議特首梁振英入場兼表態撐香港隊喎。
八方聽聞,其實好多關場波事嘅司局長,剛好比賽日不在港,好似上次有入場睇港隊嘅財爺,嗰日剛好去咗土耳其,冇得再入場睇波撐港隊,唔使做人生的抉擇。至於主責體育事務嘅民政事務局局長劉江華,稍後又咁啱要飛,響應CY號召搞內交,所以都係「逼不得已」無法入場捧港隊囉。但佢嘅政治助理徐英偉,近日則喺fb留言「香港勁揪」,繼續撐港隊,唔通係抗旨之舉?

建制獻計CY入場撐

早前就有建制中人向CY獻計,認為佢應該入場撐香港隊,話咁樣有利團結港人,而且撐港隊亦不涉政治正不正確,好似如果北京隊對國家隊,北京人都會支持自己嗰隊,但CY似乎對呢個建議冇乜反應。
無論傳言係咪真,八方發現政界中人對呢場波嘅稱呼,都好謹慎,講到明係香港隊對中國隊,唔會將「中港大戰」呢四粒字掛喺口邊,據知係為免政治不正確,惹禍上身就麻煩咯。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載