› 選擇地區
三藩市
紐約
洛杉磯
其他美國地區
香港 台灣 北美
 
2015年10月29日

政壹花生友:
建制小花圖阻泛民葵青翻盤 - 花生友

民建聯「小花」郭芙蓉出戰葵青,挑戰現任區議員民主黨徐生雄。

今屆區選首次取消委任制,唔少人較關心泛民可否喺葵青區翻盤、取得過半議席?可能見泛民雄心壯志,建制派嘅「小花刺客」戰術喺葵青區最明顯,唔少街坊都話被電暈。建制陣營則承認,因為調咗好多資源去葵青區,反而驚有啲區因此意外失守。
講葵青區選情前,花生友先交代吓呢區現況,話說十八區中,得葵青區仲未「一片紅」,民選議員中泛民佔近半,嚟緊新一屆無晒委任議員,泛民確有機會收復失地。

「女刺客」電暈阿伯

有當區泛民中人笑稱,建制派攻勢異常厲害,派出唔少「小花」吸睛又吸票,可能見有泛民大佬級人馬曾敗於小花手上而食過翻尋味,仲引述街坊話某建制「女刺客」電倒唔少伯伯,反觀泛民該區19候選人中,只得一個女將咋喎。
花生友都問過建制陣營,佢哋私下都話對泛民葵青區選情不能掉以輕心,所以確實喺呢區駐重兵,力保唔好失太多席,但顧此就失彼,某啲區因資源咁樣調動法,有啲危機,可能到選舉前夕,視乎最新戰況再調兵遣將。
雖則話當區泛民翻盤在望,但有泛民中人話,都要睇吓獲泛民推薦、已自動當選嘅前民主黨周奕希之後點定位,皆因佢喺政改後退黨,同黃成智等組成「新思維」話明走第三條路,希望大家走嘅都係同一條路喎。
周二、四刊出
花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載