› 選擇地區
三藩市
紐約
洛杉磯
其他美國地區
香港 台灣 北美
 
2015年10月29日

隔牆有耳:律師會嘉年華海報勁「繽紛」
任建峰︰見到都唔開胃 - 李八方

「荷里活有間大酒店~三個肥婆呀學踢波~學踢波…」八方點解咁好唱口?咪就係睇到律師會搞嘅法律繽紛嘉年華海報有感而發,口痕囉。呢張海報中嘅男仔,着住條吊帶褲半裸上身,兩手紋咗字;有女仔着住條戀殖閃令米字旗連身裙,有金髮外國少女則一身金裝打扮,唔唱番首廟街歌王尹光嘅名曲應景又點得?
據知嘉年華下月14日舉行,會員收費600蚊、非會員700,舉行地點係將軍澳一間酒店而唔係廟街;但有口痕友對八方講:「尹光啲海報都贏呢張九條街」。

「幾好玩都唔想去」

自認欠缺品味嘅老土怪律師任建峰有感而發喺fb話,最近上咗一個人事管理課程,其中一個議題就係律師行合夥人唔了解年輕律師想要乜、唔想要乜?繼而指身邊有唔少年輕律師,部份雖然同佢政見唔同,但都覺得呢個廣告「見到都已經唔開胃」,就算嘉年華幾好玩都唔想去,有啲仲話唔想認自己係律師㖭,笑指喺品味上,「我終於大概知道年輕律師不想要甚麼吧」。
八方問過佢,佢話上載咗呢張poster兼感言後,引起行內熱烈討論,一致覺得張海報唔得掂,好想知係邊個傑作。有知情人士同八方講,據知非出自會內young solicitors' group嘅手筆;八方打過畀律師會會長熊運信,但佢出咗門,幫唔到大家解答疑問。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載