› 選擇地區
三藩市
紐約
洛杉磯
其他美國地區
香港 台灣 北美
 
2015年10月14日

店東猝死 單車店結業
百人掃貨助兩老

【本報訊】元朗安樂路「順風車」單車店的老闆伍文傑(Keith)年僅37歲,全心全意打理單車店,希望店如其名順風順水,豈料上月底他到內地買貨,但返港時在深圳突暈倒,送當地醫院搶救不治,醫生指是腦幹出血致死。Keith未婚,遺下年邁的父母白頭人送黑頭人。兩老喪子之餘亦無力繼續兒子工作,決定本月底結業;近日有網友將單車店結業緊急「散貨」消息在fb廣傳,大批車友得悉結業背後悲慘故事,紛紛前來掃貨以表心意。
記者:黃昇 張家豪

相關新聞:熟客讚店東:急召維修無怨言

店東Keith與父母同住天水圍,3年前與友人合夥在元朗安樂路開設「順風車」單車店,但開業不久,友人即退出,Keith堅持獨自經營下去,由入貨至銷售一腳踢。Keith上月30日北上買貨,回程準備在深圳過關時突感不適,被送到當地醫院搶救4小時終不治。

父母:結業免觸景傷情

伍母講述愛兒子遭遇不幸時傷心不已,她說:「當時佢覺得自己唔舒服打電話畀朋友,朋友趕嚟以為佢中暑,買支水畀佢飲,佢又嘔,跟住朋友幫佢拎啲貨上車,但係睇到佢已經昏迷咗啦。醫生證實佢係腦幹出血,大陸醫生畀我哋見最後一面,但已經過咗身啦。」
痛失愛兒的伍母稱,由於她和丈夫對單車毫無認識,加上行業競爭大,無奈選擇結業。「個仔既然走咗,我哋都唔做落去,費事觸景傷情」。她又指兒子為單車店勞心勞力,「最主要係佢冇乜時間休息,搞到身體咁樣。唉!冇咗條命梗係可惜㗎啦!人都走咗,惟有自己堅強。」

店內大部份單車已售出

有網民近日將此消息上載到facebook廣傳,獲車友支持。「順風車」閘門昨貼告示指下午2時開店,但大批單車友早已抵達,高峯期有百多人在店外等候。其後Keith父母回來開舖,但因人太多要分批入內,其實這幾天大部份單車已售出,只剩10多個車架、車輪、單車衫褲等配件。
伍父稱感謝有心人及單車友支持,他坦言估不到有如此大迴響。他形容兒子是「單車舖嘅中流砥柱」,坦言:「條柱冧咗冇可能再做落去,我哋之前間中幫手,咩都唔識。」言談間更一度感觸落淚,他慨嘆兒子在內地離世,夫婦倆不停中港兩邊走辦理其身後事,又要處理單車店結業,心力交瘁。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載