› 選擇地區
三藩市
紐約
洛杉磯
其他美國地區
香港 台灣 北美
 
2015年10月13日

政壹花生友:
經民聯話同政府你死我活 - 花生友

林健鋒

政界盛傳明年嘅施政報告會提出取消強積金對沖機制,意味日後員工嘅長期服務金同埋遣散費唔可以喺強積金戶口入面攞,商界當然舉腳反對,而呢件事已發展成政治事件,平日事事支持政府嘅經民聯,既要代表商界又要支持政府,今次真係兩面不是人。
經民聯立法會議員梁君彥同林健鋒噚日同傳媒茶敍,一開聲當然係「反對、反對再反對」,梁君彥仲聲言要同政府「你死我活」,但經過一輪假設性問題挑戰後,兩人嘅反對力度即時降低。代表商界嘅林健鋒係行會成員,被問到政府若一意孤行,係咪辭咗行會咁型先?佢話呢個係猜測性問題,唔回應。

自由黨另起爐灶研MPF對沖

如果梁振英喺明年施政報告公佈話取消,經民聯7票會唔會喺施政報告「致謝議案」一如以往投支持票?定係唔投票話走咗去洗手間辦公先?如果條例草案上到嚟,支持定反對呢?兩人同稱到時先決定,因為仲有好長時間。有人問及CY若決定履行呢個選舉政綱,經民聯仲會唔會支持CY做特首呢?梁君彥話,家吓邊隻馬落場競選都未知,視乎未來發展,強調視乎參選特首嘅人對香港整體營商環境有冇影響。
經民聯喺支持政府方面任重道遠,不時鬧爆CY嘅自由黨對上述問題來得較經民聯撇脫,無後顧之憂,所以自由黨決定另起爐灶,自己搞反對取消強積金對沖平台,難怪經民聯搞七大商會平台,自由黨都唔加入啦。自由黨張宇人早前講過,擔心經民聯會轉軚,出賣中小企喎。

花生友
周二、四刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載