› 選擇地區
三藩市
紐約
洛杉磯
其他美國地區
香港 台灣 北美
 
2015年10月13日

隔牆有耳:四手合奏 四目交投
曾浩輝、梁卓偉hehe彈琴 - 李八方

原來hehe呢個風潮,唔係佔領期間先帶起㗎!人稱神童輝嘅衞生防護中心前總監曾浩輝,噚日以香港社會醫學學院副院長身份,出席香港醫學專科學院傳媒午宴。久未露面嘅佢個樣無乜點變,依然孩子臉,唔少記者圍住佢風花說月,其間預告嚟緊會喺一個慈善音樂會表演鋼琴,更加憶述那些年,原來曾經同港大醫學院院長梁卓偉一齊彈同一個鋼琴,四手合奏、四目交投,嘩,八方聽完梗係笑佢兩位精英咁纏綿。

投資股票「三級燒傷」

原來早已係鋼琴高手嘅神童輝,嚟緊仲會考其中一種鋼琴演奏級。𠵱家無工一身輕嘅佢話呀,平日除咗行街睇戲食飯,都有好多搞作㗎,例如近期讀緊皮膚科文憑,佢話冇醫人太耐,想學番啲臨床醫學知識,亦會喺大學客串教書,加埋嚟緊要喺慈善音樂會表演彈琴,怕且都有排唔得閒。
近期股市插水,一向有投資股票嘅神童輝聲稱自己都有損手,仲要係三級燒傷;同枱嘅香港醫學專科學院主席李國棟就叫佢學吓災難應變,但係要預防災難就好難㗎嘞。嚟緊有新私家醫院落成,有記者問神童輝會唔會重出江湖?佢好謙咁話自己唔識做,都係得閒去吓旅行好啲。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載