› 選擇地區
三藩市
紐約
洛杉磯
其他美國地區
香港 台灣 北美
 
2015年10月10日

隔牆有耳:
田少睇死唔掂 
梁君彥「登位」即蝦碌 - 李八方

立法會噚日復工,內會同財委會競選新一輪正副主席,立法會「自民黨」首度合作,全程力撐民主黨主席劉慧卿同單仲偕,爭內會同財委會副主席,雖然最後「自民黨」合作都要輸,但八方不能不讚田少有眼光,因為佢除咗支持民主黨,當日都撐黨友張宇人代替梁君彥做內會主席,果然梁君彥噚日一坐上主席位就出事,仲俾林大輝即場開拖!
話說自由黨一早話明會支持民主黨,所以單仲偕未投票前,見到田少即上前握手,兩人拍晒膊頭,狀甚老友,就算後來輸咗,單雞都有走去多謝自由黨。

林大輝開拖鬧失職

其實田少做咗咁耐議員,建制邊個得、邊個唔得佢點會唔知!好似梁君彥噚日一當選內會主席,坐上個位唔夠一分鐘就出事!話說梁君彥即時以內會主席身份,主持副主席選舉,唔知係咪趕收工,竟未有預留時間畀參選人發表政綱,又冇畀議員質詢參選人,惹來「大師」、工業界林大輝即場開拖鬧佢「失職」,又鬧梁君彥開會「成日講嘢時耷低頭,唔睇住出面」,惹來人力議員陳偉業都要嗌句「林大輝好嘢」。
至於當選財委會主席嘅陳健波,佢以往出名鬧人唔使本,試過鬧拉布議員係「人渣」、泛民議員「呃飯食」,難怪噚日參選主席時,俾泛民質疑佢情緒有問題,難得拉布議員長毛大方搞gag話,「佢(陳健波)情緒唔係佢決定,係由我決定嘅」,惹來全場議員大笑。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載