› 選擇地區
三藩市
紐約
洛杉磯
其他美國地區
香港 台灣 北美
 
2015年10月06日

政壹花生友:
內地𥄫實吳曉東網媒 - 花生友

吳曉東

又話紙媒已死嘅?點解高登討論區會逆流出《巴絲打》,《都市日報》老闆黃浩又谷緊一本《3週刊》嘅?花生友都唔係呢方面專家,好難有獨到嘅拆局畀到大家,只可以講,喺紙媒又看似有啲生機之際,網媒依然係大勢所趨,而資深記者吳曉東發起成立、主打偵查報道嘅通訊社 FactWire(事實傳真通訊社),都算最矚目嘅一間。
其實吳曉東呢次籌款都算成功,短時間內籌到逾300萬,令到呢個港人共同創辦嘅通訊社得以成立。唔知係咪跑過內地新聞嘅吳曉東個朵好勁夠響?有泛民中人話呀,早前有啲北京嚟嘅中間人,談天說地之時,無不提及呢個通訊社,猛問係乜東東嚟㗎?會做啲乜嘢新聞㗎?甚至有人猜疑,通訊社係咪為未來幾場選舉而成立?

自知網上創意差幾皮

泛民中人聽到佢哋妙想天開都冇咁好氣,話人哋想做通訊社做一啲深度古仔,點解都要傳言滿天飛?猜測嘅動機當然不明,但好明顯嘅係,內地都開始關注到網媒嘅殺傷力,據說唔少中間人都好關注香港網媒嘅發展,話𠵱家嘅時事議題嘅立場同角度,似乎都被網媒牽住走。
知己知彼,據聞內地專責港澳部門都知道,輿論戰已經轉晒喺網上開打,所以未來都會積極泵水搞好網媒,但中間人都不諱言,講到網上攻勢,一定唔夠泛民支持者,事關創意上都差幾皮,花生友都欣慰佢哋仲有自知之明。

花生友
周二、四刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載