› 選擇地區
三藩市
紐約
洛杉磯
其他美國地區
香港 台灣 北美
 
2015年10月06日

隔牆有耳:孖生許Sir幫警fb響頭炮
一個下晝逾萬個like 犯規留言刪唔切 - 李八方

舊年佔領期間,警察公共關係科總警司許鎮德幾乎日日主持記者會,4點鐘許sir紅透網絡,「或者我重申」同「Recap in English」變咗集體回憶。香港警察噚日正式推出官方facebook專頁,仲有兩個許sir拍片打響頭炮,重申叫大家支持警隊,點睇先?
噚日下晝4點警隊推出官方專頁,到夜晚7點已經超過1萬個like。第一擊係許sir粉墨登場「四點鐘新聞台」,一個係真.許sir,一個係Q版電腦動畫許sir,遲啲就係由呢位Q版許sir做主播,同大家介紹警隊活動、防罪訊息等,唔知有冇環境局隻抽水怪「大嘥鬼」咁搶眼呢。

網民狂問幾時拉朱經緯 七警

高級警司關翠貞話,遲啲仲有少年警訊隊員做小記者,去採訪警犬訓練學校嘅狗BB,亦會介紹吓警隊嘅特別部門同冷知識。Madam關提醒,網上犯法喺現實生活一樣要負刑責。八方就提醒,用電腦記得要誠實呀。
多一個溝通渠道,網民當然唔會錯過踴躍發表,許sir條片4個鐘已經有6,000幾個留言,不過好多都係問警隊「幾時拉朱sir」同埋「幾時拉暗角七警」,其他嘅都係粗口居多,當然亦有撐警網友話支持啦。
其實警方寫晒免責聲明,講明粗口、欺凌、騷擾、辱罵、色情或廣告等留言,都會刪post,亦唔保證會覆,可惜面對海量犯規留言,3位admin就算三頭六臂都刪唔切。警司謝振中話,警隊尊重市民享有言論自由,唔會因為有敏感案件字眼而刪留言,但講明警隊係唔適宜公開討論案件嘅。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載