蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年10月01日

隔牆有耳:前金融才俊接棒做主持
《警訊》新男神玩神秘 - 李八方

Kevin Sir羅啟宏身為警界男神,當然要chok住擺甫士。港台提供照片

港台節目《警訊》即將有警界新男神做主持。大家都好like嘅現任主持Keith Sir劉家業,主持咗《警訊》兩年嘞,係時候告別螢幕調任其他部門駐守。接得棒嘅,當然要高大有型得嚟又入到屋,警隊最終搵嚟2009年入警隊、駐守過西九龍衝鋒隊嘅Kevin羅啟宏登場,由呢個有兩個囝囝嘅型男爸爸,宣揚滅罪訊息。唔知《警訊》嘅女歹徒見到佢,會唔會好想束手就擒呢?

八方打探過嘞,呢位Kevin Sir加入警隊前喺金融界打滾過5年;加入警隊後,曾經駐守長沙灣軍裝巡邏小隊、深水埗特別職務隊、深水埗刑事調查隊、西九龍機動部隊、西九龍電台以及西九龍衝鋒隊。非常高大嘅佢,據聞動靜皆宜,籃球、跑步、行山、游水、閱讀同音樂都係佢嘅興趣。
盛女當然好想知,呢位警界男神幾多歲?唔知係要保持神秘感定要保護私隱,港台都未能提供資料,但可以話畀大家聽嘅係,Kevin Sir已經成家立室,仲有兩個分別4歲同兩歲嘅囝囝,據聞佢係住家男人,好珍惜同家人相處時光。

錄影好淡定 周六登場

Kevin Sir會喺10月3日周六晚7點喺無綫翡翠台及8點半港台電視31播出嘅新一輯《警訊》登場,日前已經錄影,據聞Kevin Sir好淡定唔怯場。
港台就話,Kevin Sir對於接任《警訊》主持既興奮又緊張,當然都覺得好榮幸,話會秉持前任Keith Sir嘅專業,肩負呢個主持重任,希望同另一主持陳曉琪KellyJackie將最新嘅警隊資訊同防罪訊息帶畀觀眾。Keith Sir就話《警訊》為佢帶嚟好多寶貴同難忘嘅經驗,感激節目台前幕後所有工作人員,自己已經準備就緒,迎接下一個工作嘅新挑戰。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載