› 選擇地區
三藩市
紐約
洛杉磯
其他美國地區
香港 台灣 北美
 
2015年09月27日

傘運1周年:黃藍絲unfriend後破冰無期

【本報訊】佔領期間,不少市民因政見分歧而與親友爭拗不斷,在社交媒體更掀起一股unfriend潮,互相取消關注對方或退出群組,不相往來。事隔一年,unfriend潮餘波未了,不少警務人員至今仍被unfriend,他們慨嘆佔領行動令本港社會撕裂及兩極化,要回復昔日理性和諧社會尚有很遠的路途。另有人至今仍盡量避免與政見不同的親友見面應酬,以免擦槍走火傷感情;有黃絲寧留守香港,拒與丈夫返英定居。
記者:謝明明 張嘉雯

相關新聞:佔中輔警兩面不是人

不少警務人員至今仍被unfriend,有警員稱,去年9.28警方發射催淚彈後,即被不少朋友unfriend,「就算佔中已經結束,至今仍然被unfriend,唔少夥計都遇到相同情況」。
這名警員嘗試主動與朋友修補關係,卻遭冷待,「我同佢哋講見面只閒話家常,唔講政治,但對方反應冷淡,我真係好唔開心,我只係打份工,作為警察要執行指令,但唔代表我唔支持民主,我都爭取一人一票真普選,只係我唔認同用暴力等不合法手段爭取」。他無奈地說:「佔中令唔少人心中有條刺,好難修補,以往香港人理性同互相尊重文化已經不存在。」

黃絲:費事眼冤兼勞氣

本身政見偏向黃絲的公司董事Allen說,佔中期間因不滿部份藍絲親友發表的政見而短暫退出社交群組,「費事眼冤兼勞氣」。雖然他已重新加入社交群組,但至今仍盡量避免應酬,以免擦槍走火傷感情,「尤其是唔會去有好多藍絲出席嘅聚會」,就算家庭聚會也不例外,「屋企聚會有時難免會談論政治,部份家人會話政府管治失當係同佔中有關,我聽到就唔舒服」。
Allen直言:「喺佔中期間,部份藍絲同黃絲採取極端手段,兩邊都做得唔啱」。他感慨地說:「佔中令香港社會撕裂,唔少人仍然抱着非黃即藍對立心態,完全容許唔到中間其他顏色。」他認為若梁振英仍繼續出任特首,裂痕恐只會越來越深。
佔領後,不少人嚷着移民,偏偏可輕易獲居英權的黃絲Anna卻放棄出走機會,任由英籍丈夫一個人變賣樓房,返英重新開始,自己則租住新界小屋,每晚睡卡板。
Anna自言曾任職警隊的丈夫也對香港失望,但不能如丈夫一樣灑脫,「香港係幾艱難,但我唔想咁樣走咗去,我都唔知可以做到乜,但只要可以影響到一個人,我都想留低」。

相關新聞:傘運移民潮 僅曇花一現

主婦上前線捱催淚彈

本身是家庭主婦的Anna近年走上前線,聲援罷課、捱催淚彈、留守金鐘旺角,丈夫30多年前由英國來港加入警隊,雖已退休,但謹守中立,「打開報紙,聽到新聞,佢都會咒罵,點解香港𠵱家變成咁?點解政府部門會咁樣去做一啲嘢?完全可能係唔合法嘅」。
她指丈夫因為憤慨,今年3月動身回英國,「可能因為佢係外國人,始終覺得香港唔係佢地方,厭惡香港𠵱家個氣氛,就賣咗層樓,返咗英國,我係有少少唔忿氣,雖然我自己都可以走咗去,但我啲朋友、屋企人走唔到,希望留低可以陪一陪佢哋」。
她自言患上佔領後遺症,新居的床架由卡板搭成,笑說:「其實𠵱家喺街見到鐵馬都好想搬返屋企,對膠索帶、口罩眼罩都好有感情。」佔領一周年,Anna終於決定年底往英國,「好傷感,好唔捨得,但冇辦法㗎,𠵱家好似同我先生分咗居咁,佢已經喺嗰邊買咗屋,冇可能咁樣長時間分開,佢知道我個人衝動,第日有乜事實會返香港,佢要我無論如何都攞咗個passport先」。

《雨傘一周年》:
http://umbrella.appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載