› 選擇地區
三藩市
紐約
洛杉磯
其他美國地區
香港 台灣 北美
 
2015年09月16日

隔牆有耳:防空警報變愛的音訊
10.1煙花取消「炸」維港 - 李八方

知衰,總好過死雞撐飯蓋!因為南丫海難同雨傘運動而停辦兩年嘅十.一煙花滙演今年復辦,最特別一幕可算長36秒嘅「抗戰勝利70周年」,防空警報音效加上猶如槍林彈雨情景,惹嚟唔少爭議,主辦單位似乎唔想此慘痛煙花經歷,傷害市民弱小心靈,噚日宣佈將一幕改為「和平」,以「愛的音訊」取代警報聲做背景音樂。本來想藉此機會感受炮火漫天嘅人或要失望咯。
今年滙演由中資背景嘅中滔環保集團有限公司獨家贊助,上周喺記者招待會講解今年煙花滙演時,負責製作及構思嘅港星多媒體製作有限公司行政總裁毛偉誠曾話,「抗戰」呢幕會好震撼,因為製造戰爭同和平強烈對比,未經歷過打仗嘅人可以感受吓。

有人讚 有人嘆失望

呢一幕首20秒會以防空警報為音效,用上單色閃光煙花營造槍林彈雨情景,好似飛彈轟炸咁,將維港化為戰場嘅場景,果然未上演先震撼,引發全城批評,結果中滔環保集團有限公司噚日話贊助煙花原意係為社會帶嚟歡樂,注入更多正能量;聽取各方意見後,決定將「抗戰勝利70周年」改為「和平」,背景音樂會以「愛的音訊」取代警報聲,愛的音訊原曲係貝多芬嘅「快樂頌」,黃霑填詞,關正傑主唱。對呢幕煙花引起唔同人士嘅關注,煙花技術統籌仲向市民致歉。有網民讚主辦單位從善如流,亦有人大嘆好失望,因為想睇煙花嘅動力都冇埋。

李八方
mailto:pf_lee@appledaily.com

識睇睇留言

Leo Lee:其實用來賀共產國生日,都幾適合,一來無幾多次,二來可以嚇一嚇共產黨。
HiuPo Lau:諗嗰個,腦袋缺氧。批嗰個,嚴重智障。
Kwok Tony:肯從善如流都抵讚嘅,好過政府衰咗仲死撐。
Alex Wong:咁咪感受唔到戰爭嗰種情況同恐怖,直接減低咗年輕人對國家全力抗戰嗰種偉大的情懷。
Karen Lee:已是兩代前的仇恨。應提倡和平,愛與共融,尊重他人,才是大國風度。
Hi Ling Chan:國慶放煙花響警報聲諗住有打仗效果?哈!咁到底想慶祝國家成立?定慶祝國家有難?緊係急急腳修改啦!得罪共產黨想公司執笠咩?
Jacky Fok:噢……唯一嘅吸引力都冇埋
資料來源:《蘋果》網頁

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載