蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年09月09日
馬上成為壹會員

魯芬濕身好鬼勁
未及曾主席醒

喺議會內見「蕉」拆「蕉」嘅立法會主席曾鈺成,就算「堅離地」變成在水中央,一樣無「蕉」慮!為咗宣傳今年復辦5周年、喺10月18日舉行嘅「新世界維港泳」,香港業餘游泳總會聯同創作單位AllRightsReserved,邀請咗香港唔同界別人士拍咗一系列「拉埋你落水」創意照為健兒打氣。

為咗「鈺」成其事,曾主席坐喺浮床椅「主持」水中會議,佢話感覺既軟又舒服,真係考慮拎返去立法會坐吓。見慣議員各出奇「蕉」嘅佢,除咗對發聲香蕉玩具愛不釋手,又鬼馬地喺「水上隨意門」從容步出,呢次佢唔問大家「玩乜?」而係大叫「好玩。」佢話好耐無游過長距離嘅水,若加以時日練習,相信可以完成渡海泳喎。

啱啱退休告別校園嘅前香港鮮魚行學校校長梁紀昌,原來曾經喺停辦前1978年嘅最後一屆賽事參加過渡海泳,佢一直覺得呢個本土盛事好值得推廣,啱晒唔同界別、階層嘅朋友參加,良心校長今次聯同三位學生一齊喺水中拍攝,佢笑笑口話覺得自己好似海龍王,有蝦兵蟹將陪伴在側。

詠春拳葉問宗師之子、年屆91歲嘅葉準,傳授詠春功夫達40多年,今次首度喺水中拍攝,水中練習木人樁法,八方見佢依然拳拳有勁,非常厲害,仲同新一代拳王曹星如一齊露兩手㖭。男神王宗堯、高登女神魯芬bb亦齊齊被拉落水,以水中特別賣相為泳手粉絲打氣。

八方聽聞今年賽事仲注入新元素,包括增加參賽名額至2,500個,又增設學校及慈善組別,一方面透過學校組別推廣維港泳同游泳文化,另一方面則透過慈善組別邀請非牟利機構籌款,鼓勵大家將愛心化為行動,唔落水都科水。

賽事小資料:
日期:10月18日(日)
時間:上午8時30分
賽道:賽道由鯉魚門三家村公眾碼頭游至鰂魚涌公園公眾碼頭
賽事全長:1.5公里
資料來源:主辦單位

相關新聞:隔牆有耳:宣傳維港泳曾主席唔「落水」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載