› 選擇地區
三藩市
紐約
洛杉磯
其他美國地區
香港 台灣 北美
 
2015年09月09日

隔牆有耳:之前閱兵約定 坐足一個鐘
馮煒光、周融 食飯密斟 - 李八方

馮煒光同周融(右)俾人發現密斟。讀者梁小姐提供圖片

上星期「幫港出聲」召集人周融同新聞統籌專員馮煒光同團去北京睇閱兵,唔知係咪冇機會傾密偈,噚日就有《蘋果》讀者撞到佢哋兩個一齊喺金鐘撐枱腳密斟,咁話晒兩個都係惹火人物,行埋一齊梗有景轟!點知馮煒光同八方講,話只係同傳媒朋友食吓飯,仲千叮萬囑八方唔好寫佢係CY嘅「紅人」,認真奇怪。
話說讀者梁小姐報料,話噚日晏晝1點幾喺金鐘某間酒家,見到隔籬枱坐住馮煒光同周融,當時佢兩個已經食完飯,但就仲坐喺度「細細聲」咁傾咗成個鐘先走,最後見到係由馮煒光負責埋單㖭。

叫人咪寫佢係紅人

八方見佢兩個咁好傾,唔知係咪又有大搞作?於是第一時間搵佢哋問問,點知佢兩個人不約而同話食飯傾吓閒偈啫!周融坦白啲,話平時同馮煒光唔多碰頭,咁啱前幾日喺北京睇閱兵時撞到,咪約埋返香港後食飯囉,實情餐飯仲有一位朋友在場㖭。不過周融冇透露係邊個囉。
至於馮煒光就吞吞吐吐好多,除咗形容食餐飯好平常外,仲話自己成日同媒體朋友食飯,包括《蘋果》嘅同事,仲話佢都有同我哋社長堅哥食飯,冇乜咁奇怪!
不過,奇就奇在馮煒光之後提醒八方,唔好寫佢做「紅人」,因為佢只係眾多幫特首做嘢嘅人之一喎。
佢係咪紅人八方唔知,但佢撐CY真係好落力,好似佢噚日喺報章專欄話,個別媒體對特首民望「只報跌不報升」,好似中大民調話特首梁振英民望升咗0.8分又唔報,真係盡忠職守!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載