› 選擇地區
三藩市
紐約
洛杉磯
其他美國地區
香港 台灣 北美
 
2015年09月02日

隔牆有耳:短褲雨傘風扇通通禁
規條多 曬到暈 閱兵攞苦嚟辛 - 李八方

特首梁振英率領嘅9.3閱兵團,今朝出發,周五返港。雖則呢次閱兵席位,政商界爭崩頭,但有啲嘢卻係爭得到都未必好喎,事緣唔少收到閱兵須知嘅隨團人士,發現此行規條多多,擔心唔攰死都會熱死喎。
到底有乜規矩令佢哋未出發、先洩氣?話說9月3日喺天安門舉行嘅閱兵儀式,雖則10點先舉行,卻要求8點已經到達,曾經參與2009年閱兵嘅李國麟話根據經驗,可能清晨4點零就要起身,準備6點幾坐官方車出發,到場後大排長龍等安檢。

相關新聞:隔牆有耳:唐唐婉拒中央 唔去閱兵

入座要行一粒鐘

咪以有車直抵現場,就算早起都唔怕,據知今次官方車輛停泊位離會場好遠,獲邀者已被知會由落車到座位,或要行一粒鐘;要行長路,着波鞋最方便啦,點知卻須正裝赴會,若然短褲波鞋,都唔知入唔入到場。據聞連同徒步及等候時間,閱兵需時長達7粒鐘;獲邀嘅湯家驊透露,政府中人溫馨提示,出發前唔好食早餐、唔好飲咁多水,因為其間若要去廁所要行好遠,過程更「安檢到你暈」。
八方睇過,9.3當日北京氣溫預計達30℃,為免暴曬7粒鐘中暑,攞把風扇仔或擔遮都好正常吖,點知原來呢啲都係「違禁品」,湯家驊話獲知會只能帶手機、相機,其他包括雨傘同風扇都唔帶得,嚴禁「傘兵」同「廢青」。萬一唔舒服又點算好?八方聽聞現場有醫療隊standby,準備隨時為在場人士急救。據知當晚6點零7點仲有場文藝晚會,但嘉賓要自己食飯後出席,預計晚上10點幾先回館休息,頻頻撲撲卻無啖好食,八方諗起都戥佢哋辛苦咯。

李八方
mailto://pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載