› 選擇地區
三藩市
紐約
洛杉磯
其他美國地區
香港 台灣 北美
 
2015年08月11日

政壹花生友:
CY拖鉛又拖 建制呱呱嘈 - 花生友

鉛水事件於多個屋邨爆發,或影響建制派票倉。資料圖片

鉛水風波一個月,到底政府有乜做過?有呀,咪就係特首梁振英出嚟宣佈過,會成立一個獨立調查委員會徹查鉛水風波囉。當時唔少分析都話呢個委員會,無非係畀建制派頂檔,等佢哋唔使喺立法會支持以特權法調查。點知委員會一直未正式成立從速開工,搞到建制派呱呱嘈,話好難向支持者交代。
有泛民中人同花生友講,有冇留意呀,民建聯見完政務司司長林鄭月娥後,喺鉛水事件上有轉軚之嫌喎,事關佢哋話立法會之前就以特權法查鉛水風波投票時,民記同工聯會等都係反對,𠵱家卻話唔排除支持;雖然民記講到明有前提,月底前唔成立就有可能支持啫,但擺明都係區選當前,唔敢失票而出言!

泛民搶攻建制基層票

花生友問過建制派中人,唔少人都對委員會只聞樓梯響唔多like,因為受鉛水風波影響嘅屋邨係基層票,明明係佢哋票倉,𠵱家卻俾泛民強力搶攻,大嘆喺地區做幾多嘢都冇用;有人仲苦笑稱,委員會拖得一日、佢哋嘅選票可能多失一張,惟有畀啲壓力政府,叫政府幫幫忙唔好hea住做。
而泛民主派因鉛水風波打咗支強心針,據聞稍後會大力向建制派施壓,要求喺立法會支持以特權法調查。有泛民話,當建制派想用拉布抹黑泛民,佢哋會用鉛水風波轟建制做嘢慢;至於要邊種區議員,咪畀選民自己慢慢揀囉。

花生友
周二、四刊出

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載