› 選擇地區
三藩市
紐約
洛杉磯
其他美國地區
香港 台灣 北美
 
2015年08月11日

隔牆有耳:晒驗身報告 證有心有力
葉劉選特首畫出腸 - 李八方

距離特首選舉仲有一年半多啲,有心人梗係要保持fit爆體質爭出閘。新民黨主席葉劉淑儀噚日就喺fb公開佢嘅「靚仔」身體檢查報告,話想呢副健康身體,「讓我(有)精力可以在未來日子,繼續長時間服務市民」。佢甚至無遮無掩咁大晒驗腸報告;有啲嘢又毋須「畫公仔畫出腸」嘅。

身份證號碼曝光刪圖

每逢選舉,梗會爆啲黑材料,候選人真係少啲心血都唔得。對特首寶座流晒口水嘅葉劉,就表明身壯力健,暗示無有怕,佢喺fb自揭體檢結果係脈搏每分鐘大約50,比正常人低,獲護士大讚有運動員脈搏,連血壓、膽固醇、血糖指數都係靚仔,自稱「脂質」(lipids)甚佳。
佢甚至po埋5年一次嘅大腸內窺鏡檢查,將大腸「絕密」照曝光,話大腸健康到連一粒瘜肉都冇,直認晒緊命,因為真係好自豪,並感謝主診醫生、人稱「朱大腸」嘅著名腸臟專家朱健華。但葉劉強調照片經過特別處理,「我是不會『畫公仔畫出腸』的」。
網民見葉劉咁打得,有人咪留言,叫佢去選特首就最啱,相信正中葉劉下懷。點知葉太「沾沾」咗1個鐘多啲,就將呢篇〈我好健康〉嘅文章刪走咗,有網民話張「腸照」有佢身份證號碼,可能因此要下架。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載