蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月09日
馬上成為壹會員

【蘋果廿年─人物篇】
李麗珊:做媽咪難過運動員

回顧香港20年,苦多樂少,為港摘下奧運第一金的風之后李麗珊,卻是港人快樂的集體回憶。萬人夾道歡呼逼爆長州,由振臂高呼「香港運動員不是垃圾」,到一句「養大子女要400萬」,珊珊陪伴港人成長。回顧重要的20年,她說2004年退役,是人生的分水嶺:「做全職媽咪,難過做運動員。」沒有風向水流可預測,更非苦練就可贏得好成績,面對血濃於水的小豆丁,鐵人終於要認輸!
記者:呂麗嬋

「做運動員,勤力會有好成績,做阿媽就唔得,冇得計算又控制唔到,你要諗方法,邊學邊教,同佢一齊經歷同成長」。自04年退役,李麗珊一直深居簡出,絕少接受專訪,她說要專心相夫教女,追回失去的時間,「做運動員,其實某程度要好自私,定咗個目標,咩都唔理,眼前只有比賽。退役前,長年在外,同屋企人聚少離多,家好似追番以前冇做過嘅嘢」。

運動員時代的李麗珊,是出名的拼命三郎。96年亞特蘭大奧運歷史性摘金,被水母咬至雙腳麻痹仍勇者無懼;02年釜山亞運,膽管炎堅持戰至最後一刻,奪金後連頒獎台都無法上。適可而止與永不放棄,她永遠選擇後者。99年與同為風帆運動員的黃德森在美國註冊結婚,一樣自把自為,「冇通知屋企人,想低調啲唔想煩,近排傾起,先知想一齊見證,只係自己任性,冇考慮佢哋感受」。

心中有團火、眼中只有比賽,是04年以前的李麗珊。那一年,因為犯錯,在雅典奧運與獎牌擦身而過,只奪得第四,自覺狀態佳又有鬥心,火速收拾心情,為下次比賽做準備,那知原來已懷了大女兒希皚。「結婚5年,有計劃生兒育女,但冇諗過咁快就有B,生完之後都冇諗過退,仲返去集訓,但牽長掛肚,掙扎咗一輪,決心退落嚟」。由無邊大海到回歸家庭,人生下半場,她一樣全力以赴。

「做媽咪,係新手,咩都唔識,基本上要重新學習」。兩個女兒,性格大不同,10歲的大女希皚文靜愛讀書,8歲的細女嘉怡就活潑好動。兩個女兒,都是慈母心中的一塊肉,「咩都畀佢哋試吓,好似我以前咁,搵到目標,真心鍾意,就會投入去做。做父母嘅,只係畀機會佢哋去試,等佢哋將潛力發揮出嚟」。

如是者,除了陪讀書,畫畫游水小提琴羽毛球單車,退役後的風之后,不單出水能跳,幾近10項全能,「啲女嘅同學都叫我auntie珊珊,鍾意我多嘢玩,唔係打吓羽毛球游吓水咁普通,試過設計條單車路線,30K(公里),由沙田踩到大美篤,佢哋未去過,影印埋地圖,要佢哋自己摸索」。儼如孩子王,說起好玩點子口若懸河,對昔日的威水史,在女兒面前就三緘其口。

「以前喺街度有人認出,要求合照,嗰女會唔鍾意,覺得有人搶走媽咪,所以退役後比較低調,唔想好似名人有特權咁」。直至女兒的一份功課,令她放下心頭大石,「份功課要寫個人物,類似偶像是誰,有人寫周潤發,嗰女竟然寫李麗珊!講番96年參加奧運,俾水母咬到但冇放棄。我其實從冇刻意同佢講,一直以為,佢唔鍾意媽咪係公眾人物」。

事事以女兒為重,但這個周六,為馬會舉辦的訓練營任義務導師,還自備風帆,鼓勵年輕人追夢,「當年,好多人幫我,到自己有能力,好想回饋番個社會,幫番啲年輕人」。沒有助手隨身,在烈日下收拾風帆組件;親身設計遊戲,讓年輕人在黑暗中得到啟發。這個冠軍,返回陸地,一樣熱血,「若有朝一日,個女想做一樣嘢,我幾擔心都好,都會尊重佢」。懂得將心比己,退役後的非常媽咪,一樣世界級。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載