› 選擇地區
三藩市
紐約
洛杉磯
其他美國地區
香港 台灣 北美
 
2015年08月08日

隔牆有耳:
阿瑟王狂請卿姐食檸檬 - 李八方

卿姐(右)力邀李國章受訪,但係李國章推三推四就係唔應承。

外號阿瑟王(King Arthur)嘅港大校務委員會委員李國章Arthur,噚日上番由佢做主席嘅數碼電台dbc做節目,開咪講港大任命副校長風波,返番去主場,阿瑟王嘅火力更強勁。咁啱阿瑟王到場嗰陣,撞到剛剛接受訪問完嘅民主黨主席劉慧卿,卿姐打蛇隨棍上邀阿瑟王接受卿姐網台節目訪問,不過阿瑟王左推右推囉。
卿姐同阿瑟王巧遇時先禮後兵,阿瑟王先盡地主之誼,主動上前同卿姐握手,卿姐當然無任歡迎。卿姐亦好坦白咁話,唔知道阿瑟王正係dbc主席,然後就發功力邀阿瑟王。

上節目要「揀個吉日」

阿瑟王一時話「跟住你好難做㗎喇」、一時又話佢接受卿姐訪問咪會相撞囉,阿瑟王仲乘勢同卿姐賣廣告話,卿姐都上得dbc,證明佢哋係公平、公正啦。
卿姐見阿瑟王推多兩推開始唔耐煩,單刀直問「你上嚟我嗰邊有乜嘢問題呢?」阿瑟王開始駁唔到,只係話去卿姐嗰度「唔啱囉」,總之「第二日啦,揀個吉日啦」。
卿姐同八方講,佢邀過阿瑟王幾次㗎喇,雖然阿瑟王次次都推,之後仲接受過其他媒體訪問,但係佢都會繼續努力,睇吓會唔會邀到阿瑟王。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載