› 選擇地區
三藩市
紐約
洛杉磯
其他美國地區
香港 台灣 北美
 
2015年08月08日

隔牆有耳:習武40年 為葉問徒孫
文又得武又得  榮總係詠春高手 - 李八方

梁家榮(右)不時參與同學會聚會,仲會同其他同門練黐手㖭。

新任廣播處長梁家榮除咗係資深傳媒人外,原來仲係一位武林中人!原來佢練習詠春已經有40年咁耐,有傳媒老行尊同八方講,好多行家都知榮總「好好功夫」,係詠春高手,八方仲check到榮總係一個叫徐尚田詠春同學會嘅董事,而徐尚田師傅正係詠春宗師葉問嘅弟子,人稱「小念頭之王」,所以榮總算係葉問嘅徒孫。

喺同學會嘅網頁相簿內不難發現,榮總喺同學會十分活躍,不時參與同學會聚會,而且仲會同其他同門練黐手㖭,從幾張相中所見,梁家榮練黐手嘅時候雙目緊閉,相信佢已去到練習閉目黐手嘅境界!

太太同明哥拍過電影

榮總除咗功夫了得、又係資深傳媒人,其實佢家人唔少亦係資深傳媒人。佢細佬梁家權都係從事新聞工作,做過《東周刊》執行總編輯;太太胡雪姬係佢第二任妻子,曾係小小超重臣、電訊盈科公關大將,仲有電影人同八方講,佢太太仲拍過電影,1986年同黃耀明、李麗珍、林保怡拍過套《戀愛季節》,仲要係潘源良做導演;胡雪姬兩個妹妹,胡麗雲就係香港記者協會前主席、胡雪麗就做過前排停刊嘅《新報》社長,胡雪麗嘅老公趙偉堅,就係日前出埋最後一期嘅《忽然1周》合併本行政總裁。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載