蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年08月01日

嘆港大三年來每況愈下
袁國勇:無力處理政治

【本報訊】港大拖延委任副校長,學術地位顯赫的港大微生物學系主任袁國勇昨宣佈辭任校務委員會委員。他指過去百年社會有矛盾都可解決,但近三年的政治事件令港大每況愈下,無力帶領港大走出困局,「不如返去搞毛黴菌好過」,決定辭任。學者分析,袁暗示亂局由特首梁振英上任後開始,校委補選將牽起變相維護院校自主公投。

記者:倪清江 呂浩然 陳沛冰

相關新聞:袁國勇辭校委信全文

獲譽為沙士英雄的袁國勇,2012年12月起出任由教員選出的四名教員校委之一,任期至今年12月。他昨近中午宣佈辭任校委,否認因本周二學生衝擊校委會而辭任,而是數月前已萌去意,一個月前向主席梁智鴻預告辭職,並與其他校委提及。
袁國勇前晚正式向梁智鴻辭任,他拒絕梁的挽留,但會留任至選出接任人,是繼研究生校委Aloysius Wilfred Raj Arokiaraj本周二宣告辭任後,四日內第二位校委辭任。他在致教員信中表示,捍衞學術自由及院校自主是他作為學者天職,「但對於近日以此為由,擾亂校委會會議秩序的行為,以致討論焦點偏離以大學利益為首位的原則,我感到非常痛心」。

「返去搞毛黴菌好過」

據悉,袁國勇反對「等埋首席副校長」後才審議法律學院前院長陳文敏出任學術人事及資源副校長。他昨數度稱「校委會最後決定就係我決定」,又以必須保密拒絕透露立場。袁稱辭任是多個理由,「喺呢個階段,我作為一個校委,冇能力帶港大走出呢個困局,所以我覺得應該辭職……我不如返番去搞我啲傳染病、毛黴菌好過,搞呢啲做咩。」在約半小時的記者會中,他重複逾10次「冇能力」。
袁國勇闡明辭任原因,「我本身係一個醫生、科學家,我係做微生物傳染病(研究),冇接受任何關於政治方面訓練,但港大係整個香港縮影,社會發生乜事,就會喺大學發生……大家知道過去嗰幾年,政治係非常之動盪,呢個政治動盪一定會帶入去港大,港大校委會係港大最高機構,政治自己會帶咗入去」。
記者問幾年即多少年?袁國勇說:「過去兩年半至三年,我慢慢了解到我冇能力去應付政治事件」……我睇到過去三年每況愈下,我哋冇能力化解矛盾,個矛盾咪好多唔同政治壓力、好多唔同價值、好多唔同文化衝突等等發生緊,大家都睇到,唔需要我講。」

相關新聞:港大近年政治風波

學者:補選成變相公投

過去三年,正是特首梁振英政府上任至今。被問及是否與梁有關,袁國勇指問題複雜,「香港過去百幾年,都係有能力令不同意見、不同文化、價值融匯埋一齊,將所有矛盾化解,成為一股新力量,以致香港過去百幾年都係咁成功,點解𠵱家唔得呢?」
梁智鴻稱尊重袁國勇決定,暫未再有校委擬辭任。他認同現時社會分化,「我一路呼籲香港人,求大同存小異,香港係我哋嘅家……當然任何嘢唔會有百分之百認同,有啲分歧,大家可以傾掂佢為止。」港大校長馬斐森指袁辭任是港大損失,但明白他的感受。他認為不覺得袁國勇「無心無力」(powerless),覺得他是一個很有影響力、很受尊敬的學者。
中大政治與行政學系高級講師蔡子強認為,袁國勇不想將自己放在政府對立面,他又一直與政府有合作,取態較為中間,「唔想同政府有直接衝突,所以隱晦話過去三年」。蔡子強指袁辭任是高明一着,因補選無可避免會有人以捍衞港大院校自主為號召「可能成為變相公投,以往選學術地位高,如果捍衞自主嘅人高票當選,政治訊息比較高」。

袁記者會語錄

【談辭校委】
「我冇呢個(政治)能力,我不如返番去搞我啲傳染病、毛黴菌好過,搞呢啲做咩。」

【評衝擊者】
「我啲學生永遠個樣都係好innocent(純真)……但我見嗰晚有啲年紀又大好多,個樣又猙獰好多,滿口粗口爛舌,嗰啲係乜嘢人?我睇唔係學生。」

【指港撕裂】
「化解一國同兩制之間嘅矛盾,就等於差唔多化解港大𠵱家發生嘅矛盾一樣,近兩、三年,香港進入好分裂、好撕裂狀態。」

資料來源:袁國勇昨回應記者提問

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載