› 選擇地區
三藩市
紐約
洛杉磯
其他美國地區
香港 台灣 北美
 
2015年07月27日

曾鈺成護弟「政府有蠢人造謠」
馮煒光:有啲事情搞錯咗

【本報訊】連日就特首梁振英換人事件發炮的立法會主席曾鈺成,昨直指政府中有人「蠢到不得了」,自作聰明造謠抹黑,指兩位前局長被撤換是因為表現差,以為這可堵住外界對梁振英眾叛親離的批評,做法令人心寒。他未有否認「蠢人」是否指新聞統籌專員馮煒光,但強調「蠢人永遠只會做蠢事」。馮煒光則稱:「我冇乜嘢想回應。」
記者:姚國雄

相關新聞:梁:社會少談義務

民政事務局前局長曾德成及公務員事務局前局長鄧國威突被撤換後,曾鈺成不停就事件發炮,他昨出席商台節目時指,撤換兩局長一事上,政府處理手法令人心寒,但責任不在梁振英身上,而是政府中有人造謠:「我認為有啲蠢人,蠢到不得了,仲自作聰明放料,我講嘅係完全徹頭徹尾嘅造謠抹黑,以為咁樣話呢兩個局長因為表現不佳、係被炒,可堵住乜嘢跳船、眾叛親離嘅人嘅口,呢個做法蠢到不得了,所以只能搖頭嘆息。」
曾指今次造謠抹黑帶來很壞政治後果,因外界會認為為何其他表現差的局長仍可留任:「十幾個局長入面,係咪呢兩個最差呢?差過佢嘅使唔使炒?我相信政府內部亦會引起好多人嘅負面嘅反應,我聽好多人講話係心寒。」

記者節目後追問他所指的蠢人是否指平日負責替梁振英聯繫傳媒的馮煒光,曾只稱造謠者肯定是政府中人,拒猜測是誰:「有啲傳媒,特別一個傳媒機構嗱嗱聲發放消息,就話呢個局長係因為青年工作做唔好,甚至導致佔領行動,我諗講出嚟都俾人笑。」他指不會與此政府中人談此事:「蠢人永遠做蠢事,你話唔到佢,今次唔做下次做。」
曾鈺成早上出席節目後意猶未盡,中午時在facebook將上述內容重寫一次,上款為「豬一樣的隊友」。
兩局長上周被免職當日,與特首辦關係密切、由梁營「齊心基金」創辦的網站「港人講地」迅速發文引述權威消息,指曾德成青年工作成效不足,鄧國威任內公僕隊伍未能建立夥伴關係,解釋高層變動為「換人」並非「跳船」,文章後來遭刪除。

相關新聞:劉銳紹:特首自製困難礙連任

議員:梁用蠢人本身好蠢

馮煒光曾被篤爆向港人講地提供梁振英行會前接收請願信的照片;港人講地亦曾率先報道梁振英未通知傳媒下的巡區消息。本報昨向馮煒光查詢曾鈺成的「蠢人論」,馮指沒有甚麼想回應:「我都未…我冇乜特別嘅嘢回應,我冇嘢想講,多謝你…我真係冇乜想回應呀,我其實亦都……點講呀,我嘅……有啲事情根本唔關我事,就咁喇。」
但馮認為曾鈺成未必是指他,又指有些事情搞錯了,卻拒透露甚麼事情搞錯:「有啲事情搞錯咗,但係算啦,我冇乜想回應喇,而且我亦都唔覺得曾主席一定係講我,佢講緊成件事情啫。」至於是否他向港人講地放料?馮只稱:「我諗有啲事搞錯咗喇,但我冇咩想講,有啲事真係搞錯咗,好冇?」
工黨李卓人指曾的蠢人論是打狗兼打主人,大家都意識到蠢人是指馮煒光,而梁用蠢人,反映梁亦好蠢;社民連梁國雄指即使是其他政府人員發消息,但梁作為上司要負最大責任。民建聯譚耀宗自言「好蠢」,故不會猜度誰是蠢人,但不點名指有些人「懶叻」、「懶醒」,有些意見會傷害其他人。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載