› 選擇地區
三藩市
紐約
洛杉磯
其他美國地區
香港 台灣 北美
 
2015年07月21日

隔牆有耳:
杜琪峯想拍傘運戲 
華仔古仔要HeHe? - 李八方

有時理想,真係會受現實牽制,唔係咁易實現,尤其涉及政治問題。好似舊年香港發生嘅雨傘運動,其實都係一個反映大時代嘅電影好題材,如果可以搬上大銀幕,一定會有好多觸動人心嘅畫面。
金像獎最佳導演杜琪峯原來都有呢個念頭,話想拍雨傘運動為題嘅戲,若然套戲真係開得成,八方好想知佢屬意邊個飾演周永康同岑敖暉、發展HeHe感情線呢?黃之鋒又啱邊個演?如果杜Sir嘅班底都有份出演,唔知觀眾介唔介意一班學生超齡呢?

坦言會為公司帶來後果

杜琪峯日前出席愛丁堡國際電影節(Edinburgh International Film Festival,簡稱EIFF),並接受雜誌《The Skinny》專訪,佢喺訪問中講到,自己心目中肯定想拍攝以雨傘運動為題材嘅電影,點解對雨傘運動咁有feel?佢話喎,雨傘運動期間,睇見學生同年輕人走上街頭,爭取民主,係凸顯緊呢班新生代對香港同香港未來嘅尊重。
但佢都不諱言,「正如我希望開拍《黑社會》第三集,無論如何,如果我現在去拍(雨傘運動為題目的電影),我想會為公司帶來一些後果」。
不過咁樣唔等於佢絕望,事關杜琪峯話明,對於喺未來拍攝有關題材嘅電影仍抱樂觀態度,「雨傘運動與當中的道德情操,以及其對香港的意義,會一直印在我的腦海、想像之中,它將來一定會出現在我的作品之中」。
八方都好期待,有《暗戰》同《黑社會》型格style嘅傘運電影,終有一日上演。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載