› 選擇地區
三藩市
紐約
洛杉磯
其他美國地區
香港 台灣 北美
 
2015年06月30日

隔牆有耳:曾鈺成office遭竊聽
CY成頭號疑犯 - 李八方

喺建制派WhatsApp內容外洩、仲未有人公開認係「內鬼」之時,《am730》噚日突然報道,曾鈺成3年前表明考慮選特首時,立法會6樓嘅辦公室俾人裝咗竊聽器,寓所都懷疑被人監視。由於當年佢篤爆過梁振英打過電話畀佢,聲言唔會搞佢嘅黑材料,所以唔少網民都話個竊聽器一定係CY裝㗎,但八方更關心嘅係,點解要喺風頭火勢之時引爆一單舊聞,唔通一如網民所言,用嚟轉移視線?
曾鈺成噚日喺立法會回應呢件事時,講番當年有傳媒中人提醒佢,有人得悉佢嘅行蹤,叫佢小心同人傾談時會被竊聽,咁職員咪買咗個反竊聽儀器返辦公室探測,真係有聲有料到,但當時搵唔到竊聽裝置,幾日後再用個儀器探測就冇聲咯。

相關新聞:隔牆有耳:專家:長毛蒲老蘭防偷聽

網民質疑轉移視線

八方同大家一樣好質疑,點解咁大件事唔報警?曾鈺成話喎,所謂竊聽係冇實際威脅,所以只當茶餘飯後嘅趣事討論,強調若冇證據,「警方都唔會理你」。咁點解𠵱家先嚟話當年?曾鈺成稱好詫異點解有報章會登呢段3年前嘅消息,叫傳媒唔使跟進,亦話唔應該同近期建制派WhatsApp群組內容外洩混為一談。
如果竊聽屬實,網民熱論CY係頭號嫌疑犯,同時指CY肯肯定冇諗過,突然被阿曾擺上枱用嚟轉移視線。雖然曾鈺成講到呢件事不值一哂,但由於有一名議員關注,立法會秘書處話會研究跟進。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載