› 選擇地區
三藩市
紐約
洛杉磯
其他美國地區
香港 台灣 北美
 
2015年06月29日

隔牆有耳:
出席講座 發問環節好尷尬 
林瘋遇強國女示愛 - 李八方

著名NBA球星「林瘋」林書豪旋風訪港兩日,噚日出席中大搞嘅Linsanity 2.0講座,除咗分享成功之道,仲遇到女粉絲示愛,唔知點解呢批瘋狂分子全部嚟自強國,只知「林瘋」愛莫能助,尷尬送上大檸檬畀女fans。

自爆唔想入哈佛

特登從北京嚟香港嘅女粉絲喺發問環節,一拎咪就問林書豪幾時會結婚,仲話「愛你愛了3年」,全場轟動之際,呢位女粉絲衝出台前問林書豪「你記得我嗎?」林書豪一臉尷尬答「記得」,但當然冇回應,係咪同樣愛足對方3年。
另一位普通話女粉絲就更直接,問林書豪有冇女朋友?林書豪雖然大嘆浪費咗問題嘅機會喎,但都回應咗一眾女粉絲心中嘅疑惑,係冇嘅。唔知呢批強國女粉絲,會唔會因此繼續心思思?
其實林書豪嘅男粉絲都唔少,有打開籃球嘅男士向林書豪請教之餘亦不忘示愛,講一句「Jeremy you are awesome」;亦有帶埋囝囝到場一睹男神風采嘅爸爸請教入哈佛之道,點知以出色球技而獲哈佛招手嘅林書豪自爆其實唔想入哈佛,除咗離屋企遠,仲因為哈佛嘅人都好叻、令佢好有壓力,現場觀眾聽到佢咁「幽默」都哈哈大笑。
林書豪仲分享唔少過去一年喺湖人隊嘅心情,話試過因為冇得落場而大喊,雖然成績麻麻,但佢話最緊要做好自己。嚟緊希望可以搵一隊啱自己風格,同埋有機會畀佢做先發球員嘅球隊。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載